Tliet każijiet ġodda ta' coronavirus; Wieħed minnhom tabib
Tnejn mill-pazjenti, anke jekk ma sifrux flimkien, kienu fuq l-istess titjira iżda dak iż-żmien ma kellhom l-ebda sintomi
minn Yendrick Cioffi
Is-Supretendent tas-Saħħa Pubblika, Charmaine Gauci spjegat kif fl-aħħar sigħat tliet pazjent irriżultaw pożittiv għall-Coronavirus biex b'kollox f'Malta 21 persuna rriżultaw pożittiv fi żmien ġimgħa.
Bħal fil-każijiet kollha preċedenti, anke dawn il-każi huma importati, li ifisser li sa issa ma kien hemm l-ebda trasmissjoni lokali tal-Covid-19.
L-ewwel każ: Tabib Malti
- Tabib ta' 23 sena. Dan mar Dublin l-Irlanda
- Siefer fit-3 ta' Marzu u wasal lura fl-10 ta' Marzu
- Fl-14 ta' Marzu kellu l-ewwel sintomi: uġigħ mal-ġisem, uġigħ ta' rasu anke sogħla.
- Mill-ewwel għamel kwarantina meta ħass is-sintomi. Jiġifieri ma marx xogħol meta kellu s-sintomi.
- Il-familja tiegħu wkoll tinsab fi kwarantina.
- Miegħu kien hemm tliet persuni u wkoll jinsabu fi kwarantina
- Sitt kollegi tiegħu tax-xogħol ukoll tpoġġew fi kwarantina mandatorja anke jekk ma marx ix-xogħol bis-sintomi
Student Malti ta' 20 sena
- Siefer ukoll Dublin kważi fl-istess ġranet tal-ewwel pazjent.
- Telaq minn Malta fil-5 ta' Marzu u rritorna lura fuq l-istess titjira mat-tabib li wkoll irriżulta fil-pożittiv.
- Beda bis-sintomi fil-11 ta' Marzu: Sogħla u deni.
- Mar lecture l-Università għal ftit ħin.
- Għaddej l-assessjar biex ikun magħruf jekk kellux kuntatt ma' studenti oħra biex jekk dawn ikollhom is-sintomi jitkellmu mill-ewwel u jekk hemm bżonn minn issa jitpoġġew fi kwartantina obbligatorja.
Raġel ta' 21 sena mill-Portugall
- Ma jgħix Malta iżda ġie biex jaħdem
- Kien Spanja meta ġie Malta fl-10 ta' Marzu.
- Fit-13 ta' Marzu beda bis-sintomi: Sogħla u qtugħ ta' nifs
- Hu u t-tfajla tiegħu għamlu kwarantina mill-ewwel
- It-tfajla tiegħu kellha xi sintomi iżda rriżultat fin-negattiv.
B'kollox, sa issa, saru 'l fuq minn 700 test fuq persuni li kellhom is-sintom u li fl-aħħar jiem kienu misefra.
Gauci spjegat li dawk il-pazjenti li qed jidħlu b'sintomi ta' qtugħ ta' nifs, anke jekk ma jkunux siefru, xorta waħda qed isirulhom it-testijiet. Sa issa saru 663 test u kollha ħarġu fin-negattiv.
Is-Supretendent appellat ukoll dwar l-importanza tal-kwarantina obbligatorja. Appellat biex min ikun fi kwarantina u jħoss xi sintomi, mhux joħroġ u jmur għand it-tabib jew għand l-ispiżjar, iżda jċempel mill-ewwel in-numru 111.
Helplines
- 111: Ċempel BISS biex tistaqsi dwar xi sintomi li qed tħoss. Qabel żur is-sit covid19.gov.mt
- 21324086: Għal aktar informazzjoni dwar il-Coronavirus
- 21411411: Għal dawk li jinsabu fi kwarantina obbligatorja u għandhom bżonn xi ħtiġijiet
Kif isir l-assessjar biex persuna titqies 'riskju għoli'
Fl-aħħar jiem smajna ħafna lil Charmaine Gauci tgħid li sar assessjar fejn ġew mitkellma dawk il-persuni li setgħu kellhom kuntatt mal-pazjenti tal-Covid-19 biex ikun magħruf kemm huma f'riskju jew le.
Gauci qalet li biex il-virus jittieħed minn persuna għall-oħra, fost oħrajn, persuna tkun trid tkun damet 15-il minuta f'kuntatt viċin mal-persuna l-oħra, jew inkella persuna tkun damet fl-istess kamra mal-pazjent għal tul ta' ħin.
Propju għalhekk, li fi fil-każ tat-tabib, sitt kollegi tiegħu tpoġġew fi kwarantina u dan sar bi prekawzjoni għax meta kellu s-sintomi, jiġifieri meta l-virus jittieħed, it-tabib ma marx għax-xogħol.