'Mhux se naċċetta tkaxkir tas-saqajn ... min naqas irid jieħu li ħaqqu' - Il-PM
Il-Prim Ministru jinsisti li se jibqa' jiġri wara l-Korp tal-Pulizija sakemm tintrefa r-responsabbilità
More in Politika
Il-Prim Ministru jinsisti li se jibqa' jiġri wara l-Korp tal-Pulizija sakemm tintrefa r-responsabbilità
Il-Prim Ministru Robert Abela saħaq li se jibqa’ jiġri wara l-Korp tal-Pulizija biex kull min naqas iħallas mhux b’sentenza ħafifa, iżda skont dak li ħaqqu.
Abela qal dan waqt stqarrija ministerjali fil-Parlament wara li lbieraħ, Miriam Pace ttellgħet bla ħajja mit-terrapien ta’ dik li kienet id-dar tagħha.
Il-Prim Ministru, filwaqt li wera s-solidarjetà tiegħu mal-familja Pace, waqt li fakkar li dan kien ir-raba’ każ ta’ djar li kkollossaw biswit siti ta’ kostruzzjoni, insista li l-poplu qed jistenna minnu soluzzjonijiet u mhux li jesprimi niket.
Kien għalhekk li Abela insista li se jkun qed jinsisti li tintrefa’ r-responsabbilità minn kull min naqas.
Filwaqt li rrifletta fuq l-aħħar każijiet, insista li l-istituzzjonijiet ħadmu bil-mod.
“Saru inkjesti maġisterjali li ħadu tul ta’ xhur. Tul ta’ xhur mhux aċċettabbli f’każijiet bħal dawn. Hemm żewġ każi li ħadd għadu ma refa’ responsabbilità għalihom,” insista l-Prim Ministru. “Mhux se nittollera aktar impunità.”
Filwaqt li saħaq li min għandu l-permessi għandu dritt li jiżviluppa, bl-istess mod huwa “dritt sagrosant” ta’ kulħadd li jgħix fil-kwiet ta’ dahru.”
Waqt li fakkar li hemm sitt persuni arrestati wara t-traġedja tal-bieraħ, inkluż il-kuntratturi u l-perit, il-Prim Ministru saħaq li “kull min naqas ilbieraħ, irid jerfa’ r-responsabbilità.”
“Mhux se nittolera xi sitwazzjoni fejn xi ħadd ikaxkar is-saqajn. Fejn il-Pulizija tgħid li hemm inkjesti pendenti...” saħaq Abela waqt li insista li jekk dan iseħħ ikun sinjal ta’ diżrispett għall-memorja ta’ Miriam Pace.
Kien hawn li Abela insista li se jkun qed jerfa’ fuqu r-responsabbilità u jassigura li r-riforma ssir. Fi kliemu, anke jekk ir-regolamenti li daħlu fis-seħħ fl-aħħar xhur kienu tajbin, hemm bżonn iżjed riformi, partikolarment mill-aspett ta’ infurzar.
“Jien kommess biex dak li seħħ ilbieraħ ma jerġax jiġri,” kompla Abela.
Appella wkoll għas-serjetà, waqt li insista li għandu jkun hemm distakk bejn il-professjoni u n-negozju u mhux il-perit ikollu wkoll sehem mill-ispett proġett.
“Ħadd mhu qed jgħid li rridu noqtlu l-industrija. Iżda hemm mod u mod kif isiru l-affarijiet,” insista l-Prim Ministru.
Għabba bir-responsabbilità lill-industrija u appellalha biex tkun responsabbli u tassigura li x-xogħol isir skont l-arti u s-sengħa.
Fi kliemu, jekk dan ma jseħħx, se jidħol il-Gvern u jittieħdu miżuri li jekk hemm bżonn ikunu drastiċi.