F'messaġġ fuq il-paġna tagħha ta' Facebook, oħt Daphne Caruana Galizia, Helene Asciak sostniet li Adrian Delia għandu jirriżenja u jġorr ir-responsabilità, kif kien qed jitlob li jsir hu stess fil-messaġġ tal-ewwel tas-sena.
F'kumment li ħalliet fuq artiklu dwar il-messaġġ ta' Delia għall-ewwel tas-sena Asciak sostniet li Delia għandu jagħmel dak li qed jissuġerixxi hu stess. Il-Kap tal-PN esprima t-tama li fl-2020 dawk li huma mistennija jġorru r-responsabilità tagħhom jagħmlu dan kemm jista' jkun malajr f'ġieħ il-pajjiż.
Dan it-tir jista' jitqies bħala l-ewwel wieħed minn ħafna li mistennijin isiru din is-sena, lejn il-Kap tal-Oppożizzjoni u l-akkużi li kienu saru kontrih minn Daphne Caruana Galizia kif ukoll rabtiet ta' negozji li kellu.
Asciak kienet ikkritikat bil-qawwi wkoll lil Delia meta dan, flimkien ma' delegazzjoni mit-tmexxija tal-PN, mar iħalli fjuri fil-post fejn qed titfakkar oħtha f'ħoġor il-monument tal-Assedju l-Kbir. Hu kien qed ifakkar it-tieni anniversarju tal-assasinju ta' Caruana Galizia.