Il-Prim Ministru Joseph Muscat fl-ewwel reazzjoni tiegħu għal dak li ġara dalgħodu bl-arrest tan-negozjant Yorgen Fenech, sostna illi sal-lum l-informazzjoni li għandu hija li la Keith Schembri, la Konrad Mizzi u la ebda politiku mhu implikat fil-qtil ta' Daphne Caruana Galizia. Huwa kien qed iwieġeb il-mistoqsijiet tal-ġurnalisti, li staqsew jekk fid-dawl ta' negozju li allegatament sar bejn Fenech u Keith Schembri kif ukoll Konrad Mizzi, hux se jitlob ir-riżenja tagħhom.
Muscat, għal diversi drabi iżda sostna illi jrid ikun prudenti u li mhu qed jgħid xejn li huwa fiċ-ċert. Qal ukoll illi ma jrid jgħid xejn li jippreġudika l-każ. "Fil-ġranet u fis-sigħat li ġejjin hemm bżonn inżommu l-prudenza," qal Joseph Muscat.
Minkejja dan, Muscat deher ħerqan biex, skontu "inneħħi ż-żrar kollu miż-żarbun. Imma illum irrid nistaqsi jekk dak li se ngħid hux se jgħin biex jingħalaq il-każ jew le," qal Muscat għall-mistoqsijiet tal-ġurnalisti. "Nistenna ftit ieħor u nżomm ġo fija ftit ieħor qaBel nesprimi ruħi," qal Muscat
Muscat fl-ebda punt ma ċaħad iżda illi Fenech qed jinżamm mill-pulizija għax jista' jkun persuna ta' interess fil-każ tal-qtil ta' Daphyne Caruana Galizia.
Kif beda kollox fuq 17 Black?
- F’Diċembru tal-2015 – Nexia BT tipprova tiftaħ kontijiet bankarji fil-Bahamas għal Tillgate u Hearnville
- Caruana Galizia tiżvela li Tillgate u Hearnville huma kumpaniji fil-Panama tal-Ministru Konrad Mizzi u ċ-Chief of Staff Keith Schembri
- Email mibgħuta minn Carl Cini ta' Nexia BT tgħid li dawn il-kumpaniji se jiġġeneraw $2 miljun f’sena
Minn fejn kellhom jaslu l-flus?
- Mingħand il-kumpaniji 17 Black u Macbridge
- Ftit xhur qabel, 17 Black irċeviet $1.6 miljun
Mingħand min?
- $200,000 mingħand l-aġent lokali tat-tanker tal-LNG
- $1.4 miljun mingħand il-kumpanija Mayor Trans li s-sid tagħha hu mill-Ażerbajġan
- Fi Frar tal-2016 - jieqfu t-tentattivi biex jinfetħu l-kontijiet – Daphne ssemmi għall-ewwel darba l-kumpaniji
X'qalu Keith u Konrad?
Aktar tard Keith Schembri joħroġ stqarrija u fiha jikteb hekk:
"17 Black and MacBridge were included in draft business plans for my business group as potential clients.
My companies make dozens of business plans such as these. However, it is a fact that neither 17 Black nor MacBridge ever became clients of my business group, and no transactions were ever recorded with these companies, or with me personally.
I have no knowledge of the transfers referred to, nor any knowledge of the alleged payment."
Dan ifisser li Keith Schembri qed jirrikonoxxi li kien jaf bl-eżistenza ta' 17 Black.
Konrad Mizzi jiċħad ukoll
Meta mistoqsi mill-Proġett Daphne, Konrad Mizzi qal li ma kien hemm l-ebda rabta bejn il-kumpaniji, it-trust u l-kumpanija 17 Black. Kelliem insista ma’ dak li dejjem qal il-Ministru Mizzi, jiġifieri li Hearnville qatt ma kellha kont bankarju u li qatt ma rċeviet flus mingħand ħadd.
Min jifforma l-Proġett Daphne?
Konsorzju ta' 18-il kamra tal-aħbarijiet internazzjonali, fosthom Reuters, La Monde, La Repubblika, in-New York Times u The Guardian, ingħaqdu fi Proġett Daphne, bl-għan li jkompli dak li bdiet il-ġurnalista Daphne Carauana Galizia.
Galizia nqatlet b'bomba f'karozza fis-16 ta' Ottubru li għadda.
X'kien żvelat l-aħħar?
- Din il-ġimgħa ġie żvelat l-allegat sid ta’ 17 Black. Yorgen Fenech, direttur tal-kumpanija Electrogas li bniet u qed tmexxi l-power station.
- Jirriżulta li l-każ qed ikun investigat lokalment bir-rapport tal-Financial Intelligence Analysis Unit (FIAU) ikun għand il-Pulizija seba’ xhur ilu.
- F’Ġunju 17, Black fetħet kont f’Noor Bank f’Dubaj.
- F’Marzu 2017, 17 Black bidlulha isimha għal Wings Development u dan wara li l-kumpanija ssemmiet fil-blog ta’ Daphne Caruana Galizia.
- F’email mibgħuta lil Mossack Fonseca, allegatament intqal minn Nexia BT li dawn jinsabu fil-proċess li jiftħu kont tal-bank f’Dubaj għal żewġ kumpaniji fil-Panama. Nexia BT fetħet iż-żewġ kumpaniji fil-Panama: ta’ Keith Schembri u Konrad Mizzi
- Keith Schembri u Konrad Mizzi dejjem ċaħdu allegazzjonijiet ta’ korruzzjoni u ħasil ta’ flus.
