Is-Sindku tal-Belt Valletta, Alfred Zammit ċaħad allegazzjonijiet li l-Kunsill Lokali mmexxi minnu ta xi struzzjonijiet lill-Aġenzija LESA biex fi tmiem il-ġimgħa ma jingħatawx ċitazzjonijiet lil dawk is-sewwieqa li jipparkjaw b’mod illegali fil-Kapitali.
Fuq il-paġna ta’ Facebook, il-Kunsill Lokali Belti ċaħad dik li sejħilha bħala “gidba sfaċċata” li nxterdet fuq il-midja soċjali u li kienet tgħid li l-Kunsill Belti ta’ struzzjonijiet lil-LESA biex bejn il-Ġimgħa u l-Ħadd, il-gwardjani lokali ma jagħmlux ronda biex iħarrku lil dawk li jipparkjaw fil-parkeġġi riservati għar-residenti.
Waqt seduta tal-Kunsill Lokali, kien preżenti wkoll uffiċjal tal-LESA li insista li qatt ma kellu xi struzzjonijiet mis-Sindku dwar dan.
Fil-fatt, waqt l-istess seduta, intlaħaq qbil biex issir laqgħa urġenti mal-ogħla uffiċjali tal-LESA biex ikun assigurat li l-liġi tiġi osservata.
“Min qed jinqeda bil-midja soċjali u jxandar nuqqas ta’ verità, qed jagħmel ħsara lill-progress fil-Belt Valletta u lir-residenti nfushom,” insista Zammit.