"Ir-residenti ta' Santa Luċija għandhom kull dritt li jkunu jafu għaliex siġar li nqalgħu ftit jiem ilu minn din il-lokalità minn Infrastructure Malta, li hija taħt ir-responsabbiltà tal-Ministru Ian Borg, ittieħdu sabiex jitħawwlu f'Ħad-Dingli ġo għalqa privata u li mhix tal-Gvern, b'mod temporanju."
Hekk saħaq id-Deputat Nazzjonalista Jason Azzopardi fi stqarrija maħruġa mill-Partit Nazzjonalista li fiha staqsa kif intgħażlet għalqa f'Ħad-Dingli u mhux postijiet oħra viċin Santa Luċija.
Jason Azzopardi staqsa wkoll x'garanzija qiegħed jagħti l-Gvern li din hija biss miżura temporanja u li s-siġar jerġgħu jsibu posthom f'Santa Luċija
"L-Oppożizzjoni tesiġi li l-Gvern ma jkomplix bil-politika tal-ħabi, kif qed jagħmel f'dan il-proġett ta' Santa Luċija, li se jfisser il-qerda ta' kwazi 500 siġra," staqsa Azzopardi.
Temm jisħaq li din "il-qerda" li setgħet tiġi evitata li kieku l-Gvern għamel konsultazzjoni minn qabel.
"Il-Gvern għandu jgħid il-verità kollha dwar id-deċiżjonijiet li qegħdin jittieħdu,' insista l-Kelliem.