Il-Partit Laburista se jkun qed iressaq madwar 400 kandidat għall-elezzjoni tal-Kunsilli Lokali li se jsiru fil-lokalitajiet kollha ta' Malta u Għawdex. Din hija l-ewwel darba li l-elezzjonijiet tal-Kunsilli Lokali se jsiru kollha f'daqqa hekk kif saru tibdiliet mill-Gvern preżenti. Kien deċiż ukoll li ma jibqgħux isiru l-elezzjonijiet tal-Kunsilli Amministrattivi f'rħula żgħar bħal Burmarrad, Bubaqra u Paeville.
Fil-Belt Valletta, il-Prim Ministru Joseph Muscat sostna li dan huwa l-akbar grupp ta' kandidati li qatt ressaq partit f'elezzjoni tal-Kunsilli Lokali. "Qegħdin nitolbu lill-Maltin u l-Għawdxin biex jagħżlu u jagħmlu ġudizzju minn fost dawn in-nies"
Muscat sostna li l-PL għandu tim divers ħafna, "għandna ħaddiema, żgħażagħ, persuni li jaħdmu għal rashom, kandidati inqas minn 18-il sena u għandna 24% tal-kandidati li huma nisa, terz minnhom ġejjin mill-programm Lead." Fakkar illi din hija żieda notevoli mill-15% ta' nisa li kien ħareġ fl-aħħar elezzjoni.
"Għandna żieda drastika ta' kandidati Għawdxin u għandna kandidati f'kull lokalità, imferrxin madwar pajjiżna. Issa ejja naħdmu biex inġibu l-aħjar riżultat possibbli, imma wara l-25 ta' Mejju naħdmu għal-lokalità."
Il-Mexxej Laburista għamel referenza għall-kandidati b'diżabilità li se joħorġu f'isem il-PL."
Huwa appella lin-nies biex joħorġu jivvutaw u qal li huwa ta' swied il-qalb li "l-PN prova jċaħħad 130,000 persuna milli jivvutaw li kieku l-PL ma ppreżentax kandidati iktar milli hemm bżonn. Fejn issa għandna maġġoranza awtomatika m'aħniex se nkunu kompjaċenti."
Huwa fakkar illi l-PL se jkollu programm elettorali f'kull lokalità.
