George Vella se jkun il-President li jmiss

Joseph Muscat iħabbar li l-President li jmiss li se jkun l-eks Ministru Laburista George Vella

George Vella,  se jkun il-President tar-Repubblika li jmiss
George Vella, se jkun il-President tar-Repubblika li jmiss

Il-Prim Ministru Joseph Muscat għadu kif ħabbar li l-eks Ministru George Vella se jkun l-10 President ta' Malta. 

Fuq Twitter, il-Prim Ministru ħabbar li se jkun qiegħed uffiċjalment jipproponi lil Vella bħala President u dan wara li l-approvazzjoni unanima kemm tal-Kabinett u anke tal-Grupp Parlamentari Laburista.

Aktar tard, il-Prim Ministru rringrazzja wkoll lill-President Marie-Louise Coleiro Preca għax-xogħol li wettqet fl-aħħar ħames snin u qal li se tkun qed tkompli x-xogħol tagħha permezz tal-Fondazzjoni għall-Benessri tas-Soċjetà.

Għadu mhux magħruf kif se jkun qed jilqa' din l-aħbar il-Partit Nazzjonalista, wara li fl-aħħar ġimgħat il-Kap tal-Oppożizzjoni Adrian Delia ħeġġeġ lill-Prim Ministru biex jagħżel President mill-kamp tal-Partit Nazzjonalista.

Dan apparti appelli, kemm mill-partiti politiċi u anke mill-Kummissjoni Venezja biex il-President li jmiss ikun magħżul biż-żewġ terzi tal-vot Parlamentari u mhux b'maġġoranza sempliċi.

Min hu George Vella?

George Vella twieled iż-Żejtun u din is-sena jagħlaq 77. Huwa kien gradwa bħala tabib fl-età ta’ 22 sena fejn kien ukoll lettur u fl-Università.

Huwa kien speċjalizza fil-mediċina tal-avjazzjoni u kien appuntat ukoll konsulent mal-Air Malta u mad-dipartiment tal-avjazzjoni ċivili.

Dr Vella kkontesta l-ewwel elezzjoni ġenerali mal-Partit Laburista fl-1976. Huwa ma kienx elett immedjatament iżda b'elezzjoni każwali sentejn wara. 

Huwa kiens serva wkoll bħala Deputat Mexxej tal-Partit Laburista għall-Affarijiet tal-Parlament u fl-1996 kien magħżul ukoll bħala Deputat Prim Ministru u Ministru għall-Affarijiet Barranin.

Huwa ma kkontestax l-aħħar elezzjoni ġenerali.

 

'Wieħed mill-ftit politiċi li qatt ma kellu l-iċken dell fuqu'

Il-Prim Ministru Joseph Muscat, f'filmat fuq Facebook, qal li George Vella għandu l-kwalitajiet essenzjali biex ikompli fejn ħallew il-Presidenti kollha tar-Repubblika.

Huwa ddeskrivih bħala persuna ta' integrità kbira.

"Ftit nista' naħseb f'nies li servew għal snin twal fil-politika u li qatt ma kellhom l-iċken dell fuqhom," qal il-Prim Ministru. "Dan huwa ingredjent importanti ħafna."

Kompla jgħid li George Vella qatt ma fittex il-poter tant li rrifjuta kemm-il darba. "Dan, minnu nnifsu, jagħmlu l-persuna ideali għal din il-kariga," kompla Muscat.

Fakkar ukoll li l-President magħżul għandu esperjenza kbira fir-relazzjonijiet internazzjonali u għalhekk jista' jagħti kontribut importanti fl-irwol internazzjonali ta' Malta.

Temm jirringrazzja lill-President Marie-Louise Coleiro Preca għall-ħidma kollha tagħha. "Ħalliet timbru u effett kbir fuq il-ħajja tal-Maltin u l-Għawdxin...kienet simbolu ta' għaqda u ta' kemm in-nisa mxew u se jkomplu jimxu 'l quddiem." qal Muscat.

More in Politika