Saviour Balzan, editur Maniġerjali tal-kumpanija Mediatoday, ma tantx jomgħoda kelma. U fil-fatt ma tantx dam jomgħod kliemu dwar il-mina bejn Malta u Għawdex, li skont l-eks Deputat Laburista Franco Mercieca se ssir żgur u dwarha d-dibattitu magħluq.
Balzan sostna illi minkejja li diversi Deputati jħossu illi dan il-proġett huwa "ġennata kbira" li se jkompli jeqred il-ftit natura li għad fadal, dawn imbagħad jibżgħu jgħidu dak li jħossu minħabba ripġerkussjonijiet politiċi.
"Naf ħafna deputati li jaħsbu illi l-proġett tal-mina hija idea medjokri ... imma m'għandhomx il-kukki jgħidu li ma jaqblux."
Diversi għaqdiet ambjentali sostnew l-oppożizzjoni tagħhom kontra dan il-proġett l-aktar minħabba li dan jista' jipperikola wieħed mill-isbaħ widien f'pajjiżna; Il-Pwales li huwa wkoll art għammiela ħafna b'diversi għelieqi.
Fuq in-naħa ta' Malta l-mina hija ppjanata li tiżbokka fil-limiti tal-Limbordin.