Filippini mwissija dwar 'individwi bla skrupli' li qed jimpjegawhom f'Malta
Żewġ stqarrijiet maħruġa mill-Ambaxxata Filippina f'Ruma jwissu lil dawk il-Filippini li jixtiequ jaħdmnu Malta
minn Yendrick Cioffi
Filippini li jixtiequ jaħdmu Malta qed ikunu mwissija biex joqgħodu attendi minn “individwi bla skrupli,” li qed jimpjegaw ħaddiema barranin mhux skont il-liġi.
F’żewġ kommunikazzjonijiet li ġew ippubblikati f’Settembru u f’Novembru mill-ambaxxata Filippina f’Ruma, Filippini qed ikunu mwissija kontra skemi ta’ ingaġġ li qed jintużaw minn ċertu “individwi bla skrupli f’Malta bi ksur ta’ liġijiet Maltin u Filippini biex jisirqu flus mill-vittmi.”
Filippini qed ikunu mwissija biex jekk jixtiequ jaħdmu Malta, jagħmlu dan permezz ta’ “rotot uffiċjali,” jiġifieri aġenziji liċenzjati Filippini u anke permezz tal-“Philippine Overseas Employment Administration.”
L-ambaxxata tispjega li l-Filippini li jaħdmu barra mill-pajjiż jistgħu jintalbu jħallsu miżata ekwivalenti għal xahar paga u li l-istess miżata tkopri l-ispejjeż kollha, inkluż tariffi oħra relatati mal-ingaġġ tal-impjegati.
F’Lulju ta’ din is-sena, il-gazzetta ILLUM kienet irrappurtat kif fost it-12,407 ħaddiema f’Malta li ġejjin minn barra l-UE, l-akbar komunità huma l-Filippini.
Sal-aħħar tas-sena li għaddiet Malta kellha 2,413-il ħaddiem minn dan il-pajjiż.
Il-Filippini jkomplu jiġu mwissija biex qabel iħallu l-Filippini lejn Malta jassiguraw li l-kuntratt tax-xogħol tagħhom ikun irreġistrat mal-“Philippine Overseas Employment Administration” u li kwalunkwe emenda jew bidla fil-kuntratt għandha l-ewwel tkun approvata mill-istess awtorità
