Politika Kronaka Soċjali Intervisti Zekzik Poodle Għawdex Qrati u Pulizija

Skrivani u 'cleaners' qed jagħmlu xogħol ta' kostruzzjoni f'Monte Carmeli - GWU

Il-GWU tirreġistra tilwima industrijali fl-isptar illi l-kundizzjonijiet tal-ħaddiema fih għadhom kif laqqtu ċertifikat ikrah mill-Awditur Ġenerali...

Albert Gauci Cunningham / 22 t'Awwissu 2018 15:09
'Wara ġimgħat ta’ diskussjoni li ma waslu mkien konkret, il-General Workers’ Union (GWU) irreġistrat tilwima industrijali bil-għan li ħaddiema tal-kuntratturi impjegati fl-Isptar Monte Carmeli bħala skrivani u cleaners li iżda qed jagħmlu xogħol ta’ manutenzjoni u kostruzzjoni, jkollhom l-pożizzjoni tagħhom regolata.' Dan ħabbritu il-GWU fi stqarrija.  

L-istqarrija tgħid li malli l-GWU saret taf bil-każ, permezz tat-Taqsima Ospitalità u Ikel saru kuntatti mal-awtoritajiet tal-isptar u talbet biex jiġu rranġati l-anomaliji li qed joħolqu diskriminazzjoni u sitwazzjoni inaċċettabbli. Is-Segretarju tat-Taqsima Ospitalità u Ikel Kenny Muscat qal li l-GWU infurmat lill-awtoritajiet tal-Isptar Monte Carmeli li mhuwiex aċċettabbli li dawn il-ħaddiema qed jaħdmu xogħol li ma kienux impjegati għalih u fl-istess waqt mhumiex qed jingħataw il-pagi u l-kundizzjonijiet li suppost jirċievu ħaddiema li qed jagħmlu x-xogħol tagħhom.

“Dawn il-ħaddiema qed jagħmlu xogħol ta’ manutenzjoni u kostruzzjoni, li ta’ min jgħid li huwa siewi ħafna meta iqis l-istat tal-isptar Monter Carmeli, li iżda huwa regolat minn diversi liġijiet tax-xogħol u għal daqstant l-awtoritajiet tal-Isptar Monte Carmeli għandhom jirregolaw il-pożizzjoni tagħhom skont kif titlob il-liġi,” tenna s-Segretarju tat-Taqsima Kenny Muscat.

Il-GWU għaldaqstant wissiet li sakem is-sitwazzjoni ma tkunx solvuta, hija se tagħmel użu mid-dritt li ttieha l-liġi u qed tagħti direttiva lill-imsieħba tagħha biex ma jagħmlux xogħol ta’ manutenzjoni u kostruzzjoni.

Albert Gauci Cunningham, 32 sena, ġie appuntat Editur tal-gazzetta Illum u tas-sit illum.com.mt f'Ġunju tal-2015. Gauci Cunningham kien ġurnalista mal-Union Print. Gauci Cunningham jispeċjalizza l-aktar fi stejjer analitiċi-politiċi u anke soċjali li l-gazzetta ILLUM issa saret iktar popolari għalihom, kif ukoll fi stejjer relatati ma' politika nazzjonali u internazzjonali. Gauci Cunningham irraporta minn diversi Istituzzjonijiet Ewropej. Għall-qalb Gauci Cunningham hemm kwistjonijiet soċjali, fosthom il-faqar, il-kirjiet u l-ġustizzja soċjali.
Stħarriġ
Segwina fuq Facebook