Politika Kronaka Soċjali Intervisti Zekzik Poodle Għawdex Qrati u Pulizija Kummerċjali

Il-PN jesprimi diżappunt li l-Gvern m'aċetta l-ebda emenda minn tiegħu dwar l-IVF

'Għall-Partit Nazzjonalista, l-ewwel u l-ogħla interess hu dak tat-tfal li għad iridu jitwieldu minn dan il-proċess, wara li jiżviluppaw f'tarbija minn embrijun...'

Albert Gauci Cunningham / 6 ta' Ġunju 2018 18:12
Il-Partit Nazzjonalista qal fi stqarrija li hu qatt ma' nħeba fid-dibattitu dwar il-ħajja. "Qatt ma' staħa jkun fuq quddiemnett fid-difiża tal-ħajja mill-konċepiment sat-tmiem naturali. Fl-istess waqt il-Partit Nazzjonalista, se jibqa' jaħdem biex l-avvanz fit-teknoloġija jgħin dejjem aktar familji li jrabbu t-tfal tagħhom u jilħqu l-aspirazzjoni tagħhom."

Fl-isfond ta' dawn il-prinċipji l-Oppożizzjoni ressqet sensiela ta' emendi fl-istadju ta' kumitat sabiex jiġi emendat l-abbozz tal-liġi li ressaq il-Gvern sabiex ibiddel il-liġi dwar il-protezzjoni tal-embrijuni, liema emendi kollha ma' ġewx aċċettati min-naħa tal-Gverm.

Il-PN fakkar kif fil-proċessi ta' prokreazzjoni assistita b'mod mediku jeżistu ħafna partijiet b'interessi komuni kif ukoll distinti. "Għall-Partit Nazzjonalista, l-ewwel u l-ogħla interess hu dak tat-tfal li għad iridu jitwieldu minn dan il-proċess, wara li jiżviluppaw f'tarbija minn embrijun. Qatt ma' tista' tiġi aċċettata sitwazzjoni li jiġi ppreġudikat l-interess tat-tfal aktar u aktar fid-dawl li pajjiżna huwa firmatarju tal-Konvenzjoni tan-Nazzjonijiet Magħquda dwar id-Drittijiet Tat-Tfal li fl-aktar prinċipju importanti tagħha tisħaq li l-aqwa interess tat-tfal irid ikun il-kunsiderazzjoni ewlenija f'deċiżjonijiet li jikkonċernaw lit-tfal kif ukoll li kull tifel u tifla għandha id-dritt li tgħix u tiżviluppa."

"Matul id-diskussjoni ta' l-emendi, l-Oppożizzjoni, saħqet biex dawk il-ġenituri prospettivi li għandhom kundizzjonijiet ta' infertilità jingħataw kull għajnuna medika u klinika possibbli, mhux biss bħala servizz iżda wkoll f'termini finanzjarji. Dawn il-koppji ma' jistgħux jitħallew waħedhom f'din l-isfida u l-Istat għandu l-obbligu li jipprijoritizza finanzjament sħiħ, kontinwu u adegwat biex dawn il-koppji jkunu jistgħu jindirizzaw kull kundizzjoni li jiffaċċjaw. Sfortunatament, il-Gvern m'aċċetta l-ebda emenda tal-Oppożizzjoni u baqa' jinsisti fuq il-pożizzjonijiet tiegħu."

Albert Gauci Cunningham, 32 sena, ġie appuntat Editur tal-gazzetta Illum u tas-sit illum.com.mt f'Ġunju tal-2015. Gauci Cunningham kien ġurnalista mal-Union Print. Gauci Cunningham jispeċjalizza l-aktar fi stejjer analitiċi-politiċi u anke soċjali li l-gazzetta ILLUM issa saret iktar popolari għalihom, kif ukoll fi stejjer relatati ma' politika nazzjonali u internazzjonali. Gauci Cunningham irraporta minn diversi Istituzzjonijiet Ewropej. Għall-qalb Gauci Cunningham hemm kwistjonijiet soċjali, fosthom il-faqar, il-kirjiet u l-ġustizzja soċjali.
Stħarriġ
Segwina fuq Facebook