Il-gazzetta Taljana La Repubblica żvelat kif nofs siegħa wara li l-karozza li fiha kienet Daphne Caruana Galizia splodiet, George Degiorgio bagħat messaġġ lil martu li fih qallha 'iftaħli flixkun inbid, baby'.
Intant, l-istess gazzetta Taljana żvelat kif il-qtil ta' Caruana Galizia kien viċin li ma jitwettaqx hekk kif jidher illi Degiorgio ma kienx għad fadallu kreditu fil-mowbajl illi kien se jintuża biex jintbagħat l-sms 'fatali'. La Repubblica tgħid fir-rapport tagħha illi ċ-'Ċiniż' ċempel lil sieħbu mill-mowbajl personali tiegħu biex jżidlu il-kreditu b'top up ta €5.
Sussegwentement, Degiorgio uża t-tieni mowbajl biex jintbagħat l-sms 'fatali' fit-3:00 p.m, liema messaġġ ħalla lil Caruana Galizia bla ħajja.
Il-gazzetta Taljana, li sorprendentement kixfet dawn id-dettalji mhux magħrufin mal-midja Maltija, tirraporta li l-mowbajl li ntuża biex jintbagħat l-sms, li wassal biex splodiet il-bomba, nstab fil-baħar, viċin tal-post illi fih saru l-arresti.
Fit-3:30p.m., nofs siegħa wara l-qtil, iċ-'Ċiniż' bagħat sms lil martu, li kien jgħid 'iftaħli flixkun inbid, baby'
Degiorgio flimkien ma' ħuh kienu arrestati nhar it-Tlieta, flimkien ma' suspettat ieħor, Vince Muscat, magħruf bħala l-'Koħħu'.