Id-Deputat Nazzjonalista Clyde Puli kien l-uniku persuna li tefa’ n-nomina tiegħu għall-kariga ta’ Segretarju Ġenerali tal-partit u b’hekk b’kull probabbilità se jkun maħtur bħala s-suċċessur ta’ Rosette Thake f’din il-kariga.
Puli kien l-uniku persuna li tefa’ n-nomina wara li aktar kmieni, Pierre Portelli li wkoll kien qed ikun imsemmi għal din il-kariga nħatar bħala Chairman Eżekuttiv tal-Media.Link, il-kumpanija tal-midja tal-Partit Nazzjonalista.
Il-Kap tad-Delegazzjoni Nazzjonalista fil-Parlament Ewropew David Casa wkoll kien interessat għal din il-kariga iżda għażel li ma jikkontestax.
Fi stqarrija, Casa qal li jħoss li jista’ jkun ta’ kontribut akbar lejn il-Partit Nazzjonalista jekk iżomm il-kariga ta’ MEP u jibqa’ jaħdem minn Brussell.
Clyde Puli, li ħafna kienu qed jistennew li jikkontesta għal kariga ta’ Viċi Kap għall-Affarijiet tal-Partit, irid jgħaddi minn vot fl-Eżekittiv tal-partit biex jinħatar uffiċjalment bħala Segretarju Ġenerali.
Għall-karigi l-oħra kien hemm dawn in-nomini:
Mark Anthony Sammut għal President tal-Kumitat Eżekuttiv
David Stellini għal President tal-Kunsill Amministrattiv
David Camilleri għal Teżorier
Roselyn Borg għal Segretarju Internazzjonali
Il-ħatriet għall-karigi se ssir waqt il-laqgħa tal-Kumitat Eżekuttiv li se ssir fit-23 ta' Novembru li ġej.