Il-Qorti illum semgħet kif mara allegatament vittma ta' vjolenza domestika qalet li xorta xtaqet li tibqa' tgħix mar-raġel li taha daqqa ta' ponn.
Il-mara dehret illum quddiem il-Qorti hekk kif żewġha, Eġizzjan, kien akkuzat illi kkawża ġrieħi ħfief fuq il-mara u ġiegħla tibża' mill-vjolenza.
Fil-Qorti, liebsa nuċċali tax-xemx, il-mara sostniet illi hi bdiet tgara l-affarijiet u dak li għamel ir-raġel kien li ddefenda lilu nnifsu.
Il-Qorti osservat kif it-tnejn kienu qed jitgħannqu u juru ċertu mħabba lejn xulxin fil-Qorti.
Il-Maġistrat Natasha Galea qalet lill-akkużat illi qatt ma jista' jagħmel dak li għamel lil martu. "Ma tistax tagħmel hekk lil nartek. Qatt. Imma issa jista' jkun li qed tiffaċċja priġunerija u multa," qalet Galea qabel daret fuq il-mara u nkoraġietha biex tipproteġi lilha nnifisha.
Ir-raġel ingħata ħelsien mill-arrest fuq depożitu ta' €300 u garanzija personali ta' €3,700.