L-eks raġel tal-vittma tal-qtil Silvana Muscat għadu fuq il-lista tal-Eurpol tal-aktar persuni mfittxija fl-Ewropa, tliet snin wara li seħħ l-omiċidju illi hu mifhum illi hemm hu warajh. Ir-raġel jismu Hamid Nour Eddine Ibrahim u qed ikun imfittex mill-Pulizija Maltija wara illi dan ħarab mill-pajjiż.
Ibrahim, ta’ 37 sena huwa l-unika suspettat fl-investigazzjoni fil-qtil ta’ Muscat, li kienet martu, u kien saħansitra ttella’ l-Qorti, ġimgħat qabel l-qtil, akkużat illi b’għemilu ta fastidju lil Muscat. Hu kien ordnat biex ma jersaqx lejn il-mara.
Ibrahim u Muscat kienu ilhom miżżewġin biss sena u kienu għaddejjin bil-proċessi ta’ separazzjoni.
Silvana Muscat kienet instabet mejta fuq sodda, fl-appartament f’San Pawl il-Baħar, minn membru tal-familja b’ħames daqqiet ta’ sikkina. Sal-ħin li nstabet mejta, Ibrahim kien diġà telaq mill-pajjiż.
Sena wara li tpoġġa fil-lista tal-Europol, wiċċ il-Libjan b’karta tal-identità Maltija, għadu jidher fuq il-lista ta’ dawk li huma fost l-aktar imfittixija fl-Ewropa.
Il-karozza tas-suspettat dehret fl-ajruport Internazzjonali ta’ Malta minn fejn qabad titjira lejn Bergamo. Sorsi kienu infurmaw lill-pulizija illi Ibrahim kien deher xi mkien f’Dublin, xahar wara, l-aħħar informazzjoni li kienet ingħatat dwar Ibrahim.
Kontra Ibrahim hemm mandat ta’ arrest Ewropew kif ukoll internazzjonali. Huwa qed ikun akkużat li kkawża ġrieħi gravi u sussegwentement il-qtil ta’ Muscat.
.jpeg)
