Politika Kronaka Soċjali Intervisti Zekzik Poodle Għawdex Qrati u Pulizija

'L-Aquarius jista' jmur fejn irid, anke Malta, iżda mhux l-Italja' - Salvini

Malta u l-Italja akkużati mill-ġdid li qed jirrifjutaw 141 immigrant abbord il-bastiment Aquarius

Yendrick Cioffi / 13 t'Awwissu 2018 15:05
L-għaqda SOS Mediterranee qed tisħaq li l-bastiment Aquarius kien irrifjutat għat-tieni darba mill-awtoritajiet Maltin u Taljani biex hekk 141 immigrant li jinsabu abbord ma għandhomx port fejn jinżlu.

Dak kien l-istess bastiment li f'Ġunju li għadda ma kienx ġie aċċettat la minn Malta u lanqas mill-Italja u wara jiem bejn sema u ilma kien ġie aċċettat kemm minn Spanja u anke minn Franza.

Minkejja li l-Gvern Malti għadu ma ħareġ l-ebda stqarrija dwar dan il-każ, fuq Twitter, id-Deputat Prim Ministru Taljan, Matteo Salvini saħaq li l-bastiment huwa proprjetà tal-Ġermanja, jitmexxa minn NGO Franċiża, b'ekwipaġġ barrani, jinsab f'ibħra Maltin u jtajjar il-bandiera ta' Ġibilità. 

Kien għalhekk li insista li "jista' jmur fejn irid basta mhux l-Italja."

Sa ftit jiem ilu, mal-gazzetta ILLUM, l-istess Salvini qal li lest jaħdem mal-Gvern Malti biex tinstab soluzzjoni komuni dwar l-immigrazzjoni.

Ma' din l-NGO ingħaqdet ukoll l-organizzazzjoni Doctors Without Borders li wkoll ikkundannaw lil Malta u lill-Italja li ma laqgħux lil dawn l-immigranti waqt li talbu lill-gvernijiet Ewropej u l-awtoritajiet marittimi biex jagħtu port sigur lil dawn l-immigranti.

Malta toffri ilma u anke ġgieget tas-salvataġġ

Intant, l-istess NGO qalet li lbieraħ l-immigranti, ftit wara li ġew salvati, ingħataw ġgieget tas-salvataġġ u anke ngħataw ilma x'jixorbu u dan b'kollaborazzjoni mal-awtoritajiet marittimi Maltin.

Il-bastiment bħalissa jinsab bejn Malta u l-Italja jistenna struzzjoni biex ikun jista' jniżżel lill-immigranti.

Stħarriġ
Segwina fuq Facebook