Sorsi mill-Pulizija li tkellmu mas-sit illum.com.mt qalu li qed jiġi investigat it-tixtrid ta' ritratt li juri l-ġrieħi tal-kuntistabbli Simon Schembri.
Dan l-istess ritratt beda jdur fuq chats privati u saħansitra wasal għand il-gazzetta ILLUM.
L-istess sorsi kkonfermaw li r-ritratt huwa awtentiku u jidher li ttieħed ftit ħin wara li Schembri ddaħħal l-Isptar biex jiġi operat.
Stqarrija maħruġa mill-Pulizija, ftit tal-jiem wara l-inċident, kienet tappella lill-pubbliku biex ma jxerridx ritratti u filmati tal-inċident, anke b'rispett lejn il-familja, li kif wieħed jista' jimmaġina, għaddejja minn trawma kbira.
Il-kuntistabbli Simon Schembri għadu qed jissielet għal ħajtu fit-Taqsima tal-Kura Intensiva tal-Isptar Mater Dei.
Ilbieraħ, fil-Qorti, ntqal kif Schembri tkaxkar 400 metru taħt il-karozza li kien qed isuq żagħżugħ ta' 17-il sena. Il-każ seħħ wara li Schembri waqqaf liż-żagħżugħ għax ma kienx liebes seatbelt u talbu wkoll id-dokumenti tas-sewqan, li ovvjament ma kellux.
Fil-Qorti nstema' wkoll kif iż-żagħżugħ kien jaf li Schembri jinsab maqbud taħt il-karozza u beda jserrep biex jinqala'.
Pulizija ddeskrivew dak li raw mallu waslu fuq il-post bħala "xena minn film tal-biża'."
Iż-żagħżugħ, li fl-ebda mument ma wera rimors għal dak li għamel, tant li Pulizija qal li kien "qisu għadu kemm ħa kolazzjon," qed jinżamm arrestat.