Il-Gvern Ingliż se jkun qed jabbanduna l-abbozz ta’ liġi dwar Brexit jekk il-Parlament ma jaqbilx dwar il-programm tal-Gvern biex dan ikun diskuss fuq tlett ijiem.
Skont rapporti fuq midja internazzjonali, jekk il-programm tal-Gvern ma jkunx approvat u l-Unjoni Ewropea tapprova estenzjoni oħra, il-Gvern se jkun qed jinsisti li ssir elezzjoni ġenerali.
Il-Withdrawal Agreement Bill kien ippubblikat it-Tnejn filgħaxija u dan qed ikun diskuss bħalissa fil-Parlament.
Illejla, l-Parlament se jkun qed jivvota dwar il-programm tal-Gvern biex dan l-abbozz ta’ liġi jkun diskuss fuq tlett ijiem.
Fil-bidu tad-dibattitu, Johnson saħaq li r-Renju Unit għandu f’idejh ftehim mal-Unjoni Ewroepa u anke programm ta’ tlett ijiem biex ikun diskuss.
Insista li jekk il-Parlament jivvota favur tagħhom, il-ġimgħa d-dieħla jseħħ Brexit u r-Renju Unit ikun jista’ jimxi 'l quddiem.
L-Oppożizzjoni qed tisħaq li ma jagħmilx sens li l-liġi bħal din tkun diksussa fi tlett ijiem biss.
Dan l-abbozz ta’ liġi li l-Parlament għandu quddiemu jagħti effett legali lill-ftehim għal Brexit innegozjat minn Boris Johnson.