Aħbarijiet | 28 ta’ Frar 2010 • Nr 175

Kemm-il kilogramma ta’ mbarazz irċevejt fil-kaxxa tal-ittri?

Żewġ familji qagħdu għall-eżerċizzju li għamlet din il-gazzetta fuq medda ta’ xahrejn. JULIA FARRUGIA talbithom jaqbdu miżien u fuqu jitfgħu l-karti u fuljetti kollha li se jirċievu fil-kaxxi tal-ittri. Il-mistoqsija li staqsiethom kienet din: “Fid-59 ġurnata li ġejjin*, kemm-il-kilogramma ta’ fuljetti u rivisti se tirċievi bla ma tlabthom jew bla ma kellek bżonnhom?”

Timxi fit-triq u ssib analiżi ħelwa. Kaxxi tal-ittri mbullati sa ruħ ommhom b’karti se jtiru u ma jtirux. F’qalbek tista’ mill-ewwel tikkonkludi li din waħda mid-djar vittmi tal-assedju ta’ imbarazz li jsib ruħu fil-kaxxa tal-ittri mingħajr ma tkun tlabtu jew wisq aktar għandek bżonnu.
Titla’ pass ’il bogħod u fuq għatba ta’ residenza oħra ssib munzell rivisti jistennew ix-xorti li jidħlu ġewwa. F’bieb ieħor il-karti huma mdaħħlin bejn il-ħadid tal-persjani. Forsi min kien qed iqassam ma ntebaħx li l-kaxxa tal-ittri tinsab fil-ġenb l-ieħor tad-dar?
Tul dawn l-aħħar xhur diversi qarrejja ta’ Illum ilmentaw minn dawn il-karti li aktar ma jmur aktar qed jiżdiedu.
Għall-eżami poġġejna żewġ familji u tlabniehom biex iġemmgħu l-karti kollha li rċievu u li għalihom m’huma xejn għajr żejda u mbarazz.
Ta’ min ngħidu li meta morna biex niżnu l-materjal li rċevew dawn il-familji f’59 jum ma konniex qed niżnu kontijiet tad-dawl, tat-telefon, tal-internet u oħrajn.
Lanqas ma wiżinna l-fuljetti nfilsati fil-gazzetti li xtraw dawn il-familji fost il-ġimgħa u l-Ħadd.
Il-figuri li sibna huma xokkanti. Bix-xorti li dan l-eżerċizzju ma sarx qabel xi elezzjoni hekk kif il-volum ta’ karti bi propaganda fuqhom jisplodi drastikament.

*L-eżerċizzju tal-gazzetta Illum sar bejn l-1 ta’ Jannar 2010 u lbieraħ 27 ta’ Frar.

X’sibna f’dan l-eżerċizzju

• Medja ta’ 1kg u 400gr imbarazz miġbur minn kull familja f’59 ġurnata.

• Kuljum ifisser medja ta’ 24gr ta’ karti li se jinħlew.

• F’ġimgħa familja rċeviet medja ta’ 166gr ta’ karti.

• Il-materjal kien jinkludi fuljetti ta’ nies jirreklamaw servizz fosthom li jgħallmu l-privat, fuljetti ta’ kumpaniji li jridu jbigħu xi prodott, rivisti li jippromwovu l-bejgħ u kiri ta’ djar, supermarkets jirreklamaw il-prodotti li huma bl-offerti u fuljetti tal-parroċċa. Magħhom żdiedu rivisti ġodda ta’ kull xahar li dan l-aħħar faqqsu fis-suq.

F’xahrejn il-pustiera qassmu 269 tunellata ta’ imbarazz madwar Malta

Skont iċ-ċensiment tal-2005 f’Malta u f’Għawdex hawn total ta’ 192,314 dar. Jekk nieħdu l-medja ta’ dan l-eżerċizzju jfisser li f’Jannar u Frar ifisser li:

• F’xahrejn = 269,239 kilogramma ta’ skart
• Kuljum = medja ta’ 4,563 kilogramma
Ma’ dawn lejn l-aħħar xhur tas-sena wieħed irid iżid direttorji li mhux neċessarjament għandek bżonnhom. Nies li tkellmu magħna sostnew li huma m’għandhomx bżonn id-direttorji għaliex l-istess kumpaniji joffru dan is-servizz b’xejn fuq l-internet. “Weġgħa ta’ qalb meta nara direttorju ta’ 1,192 paġna mitfugħ fuq l-għatba ta’ kull bieb. Aktar u aktar meta ssib li l-ġenerazzjoni żgħażugħa tippreferi tuża l-internet.”

Darba l-Gvern kien ippropona taxxa fuq dan l-iskart imma reġa’ darlu

Fil-baġit tal-2009 il-Gvern kien ippropona li għal kull 80 gramma ta’ karta li titqassam b’xejn bieb bieb l-individwu jeħel €0.01 taxxa dment li aktar minn nofs il-kontenut tal-pubblikazzjoni hu reklamar.
Minkejja l-impenn ambjentali li jiftaħar tant bih il-Gvern, din il-wegħda sparixxiet mill-baġitt tal-2010. Meta l-gazzetta MaltaToday staqsiet x’ġara minn din il-miżura kelliem għall-Ministru Tonio Fenech sostna li “il-Gvern iddeċieda li ma jimplimentax din it-taxxa.”

 

 

 

 

Editorijal

Is-soluzzjonijiet u l-protesti

Arkivji 2006-2008

Arkivji 2009

Arkivji 2010

Ara x'se jkun hemm f'Reporter
mit-Tnejn sal-Ġimgħa fit-7.45pm fuq TVM