Ittri | 31 ta’ Jannar 2010 Nr 171

Libertà u libertinaġġ

Charles Mifsud,
Birkirkara

Nhar il-Ġimgħa 22 ta’ Jannar fuq il-programm Xarabank inqraw xi siltiet iċċensurati (għax il-kontenut kien ta’ natura oxxena) mill-istorja ppubblikata f’rivista partikolari fl-Università ta’ Malta. Milli stajt nifhem inqraw l-aktar siltiet li huma anqas oxxeni għax skont ma ntqal, dwar dagħa b’Alla u tal-Madonna ma nqara xejn. Forsi biex ma joffendux is-sentimenti ta’ min jemmen?
Fil-programm intqal li kemm l-awtur kif ukoll il-pubblikatur jisħqu li għandhom dritt, f’isem il-libertà tal-espressjoni, li jiktbu dak li jħossu. Jien wieħed milli ħassewhom offiżi minħabba dak li nemmnu.
Nixtieq nistaqsi jekk hux kulħadd għandu l-istess dritt? Jiġifieri jekk hux kulħadd jista’ jaqbad joffendi kif irid u kif iħoss lil min jidhirlu f’isem il-libertà tal-espressjoni. Billi dan l-abbuż, kif nemmen jien, seħħ f’forma letterarja nixtieqek tippubblikali din il-poeżija:

Stuprar
Qed jintilef kull sens ta’ mistħija,
qed jistupraw il-proża,
flimkien mal-poeżija.
Qed jintilef kull sens ta’ rispett,
Ta’ etikett
Poġġew lil kulħadd f’keffa waħda,
mank iqisu li joffendu’l min jemmen
jew ’l dak li mhux matur,
lanqas lil dawk minorenni,
li għada pitgħada se jkunu,
is-sinsla tal-futur.
Lill-bniedem xbiha t’Alla
serqulu d-dinjità,
ġabuh misteru sesswali
’il bogħod mill-verità.

Lir-raġel, fil-ħsieb tagħhom,
qed ifassluh ilsir,
lill-mara qed jagħmluha
oġġett biss għall-pjaċir.

Qed jintilef kull sens ta’ mistħija,
kull sens ta’ serjetà,
qed jisħqu li jistgħu jisserdqu
bid-dritt tal-libertà.

Editorijal

Il-pajjiż tal-meravilji

Arkivji 2006-2008

Arkivji 2009

Arkivji 2010