Pjazzetta | 14 ta’ Ġunju 2009 Nr 138
Il-kantant Ivan Grech, li hu l-frontman tal-Winter Moods, se jingħaqad ma’ Michael Bolton u mat-tenur Malti Joseph Calleja f’wieħed mill-akbar avvenimenti mużikali ta’ dan is-sajf fil-Luxol Grounds fid-19 ta’ Lulju. Dan il-kunċert hu organizzat mill-NnG Promotions, li f’Lulju tas-sena l-oħra organizzaw ukoll il-kunċert tal-Winter Moods. Dan il-kunċert jibqa’ msemmi għal fatt li attira l-akbar udjenza li qatt attendiet kunċert b’artisti Maltin.
Grech hu sinonimu max-xena tal-mużika f’Malta u flimkien mal-grupp tiegħu hu kanta għall-akbar udjenzi fuq din il-gżira. Il-karriera tal-kantant bdiet fis-snin 80 u ma damx biex ingħaqad mal-Winter Moods. Tul il-karriera tiegħu, Ivan u l-Winter Moods kantaw ma’ diversi gruppi u artisti famużi bħal Bryan Adams, Elton John, Claudio Baglioni, Fish, Antonello Venditti u Deep Purple. Winter Moods ħadu wkoll sehem fil-kunċert Isle of MTV Malta Special 2007, fejn kantaw ma’ artisti bħal Maroon 5, Enrique Iglesias u Akon.
Riċentament, Ivan irrekordja re-mix ta’ Marigold mad-duo Malti Tenishia. Din it-track kisbet suċċess kbir mas-semmiegħa tar-radju lokali u anke mal-clubbers.
Din hi l-ewwel darba li l-kunċert annwali ta’ Joseph Calleja se jikkonċentra fuq stil ta’ mużika li mhix klassika peress li se jingħaqad ma’ Michael Bolton, li se jkanta f’Malta għat-tieni darba.
Il-kunċert Joseph Calleja-Michael Bolton hu sponsorjat mill-HSBC u Vodafone Malta Limited. Il-biljetti jistgħu jinxtraw minn www.nngpromotions.com, Vodafone Retail Outlets, Exotique u ħwienet ta’ Agenda. Prezzijiet jibdew minn €35.
