Ittri | 17 ta’ Mejju 2009 Nr 133

Sehem f’Puttinu Cares

Nancy Vella,
Segretarja Sezzjoni Żgħażagħ
Santa Marija,
Qrendi

Nhar is-Sibt 25 ta’ April is-Soċjetà Mużikali Santa Marija Qrendi tat sehimha biex jinġabru flus għal għan nobbli ieħor, din id-darba permezz tas-Sezzjoni Żgħażagħ. Numru ta’ żagħżagħ taw sehimhom fis-60 siegħa maratona organizzata biex jinġabru flus għal-Puttinu Cares. Hemmhekk tajna wkoll donazzjoni ta’ €175 miġbura mill-membri tas-Sezzjoni Żgħażagħ kif ukoll minn żgħażagħ oħra partitarji li xtaqu jagħtu d-donazzjoni tagħhom.
Fl-1 ta’ Jannar il-kumitat organizzattiv ta’ Radju 15 ta’ Awwissu fi ħdan is-Soċjetà ppreżentaw ’il fuq minn €2,500 lid-Dar tal-Provvidenza. Dawn inġabru permezz ta’ xandiriet diretti fuq Radju 15 ta’ Awwissu mill-20 ta’ Diċembru sat-3 ta’ Jannar.
Ir-rwol tas-Sezzjoni Żgħażagħ fis-Soċjetà hu li norganizzaw attivitajiet bħala fund raising activities, kif ukoll ngħinu lill-kumitati oħrajn għall-organizzazzjoni tal-festa tant għal qalbna, il-festa ta’ Santa Marija.
Din is-sena saru diversi attivitajiet mis-Sezzjoni Żgħażagħ fosthom party tal-Karnival għat-tfal, maratona tal-billiard f’Marzu kif ukoll Mument ta’ Riflessjoni f’Ħamis ix-Xirka bl-għajnuna ta’ Fr. John Avellino. Is-Sezzjoni Żgħażagħ qed tgħin ukoll fir-restawr tal-armar li jintrama għall-festa.
Madanakollu bħala Sezzjoni Żgħażagħ dejjem ħassejna li għandna nagħtu ftit mill-ħin u l-enerġija tagħna għal min hu inqas ixxurtjat minna.

Arkivji 2006-2008

Arkivji 2009