Aħbarijiet | 26 ta’ April 2009 Nr 130

Attenti: il-Freephone ta’ Giovanna jisloħ

Julia Farrugia

Numru ta’ Għawdxin ilmentaw ma’ din il-gazzetta li l-Ministeru ta’ Għawdex qed jippromwovi linja Freephone (bil-ħlas) li meta ċċempel fuqha mhux talli toħodlok il-flus talli l-linja tinqata’ wara ftit sekondi.
Prattikament kull ċittadin li jċempel fuq din il-linja jkun qed jaħli flusu u ħinu għalxejn għax lanqas biss jinqeda.
Il-linja 80075556 qed tkun reklamata mhux biss fuq is-sit uffiċjali tad-Dipartiment tal-Informazzjoni iżda wkoll fuq is-sit elettroniku tal-Ministeru għal Għawdex. In-numru jingħata maġenb ir-ritratt tal-Ministru Giovanna Debono u wieħed jingħata l-impressjoni li jekk għandu bżonn ikellimha jista’ jaqbadha wkoll fuq dik il-linja.
F’eżerċizzju mifrux fuq numru ta’ ġranet din il-gazzetta ppruvat iċċempel fuq din il-linja. Ir-riżultat dejjem kien l-istess.
Wara li ċċempel 80075556 tisma’ vuċi ta’ tfajla li tgħidlek li “din it-telefonata mhix b’xejn. It-tariffa tiegħek normali tapplika.”
Eżatt wara tisma’ l-istess messaġġ bl-Ingliż. F’daqqa waħda l-linja awtomatikament taqtagħlek.
“Is-sistema hi waħda ta’ ngann,” saħqet sid ta’ ħanut fir-Rabat. “Dan għax meta ċċempel u l-linja tinqata’ taħseb li tkun ilqatt xi buttuna ħażina int. Bla ma trid terġa’ ċċempel. Ovvjament il-linja terġa’ tinqata’ u allura tkun weħilt il-flus għal żewġ telefonati għal xejn.”
Mhux magħruf jekk il-Gvern hux se jieħu passi mmedjati dwar dan il-każ. F’serq dirett fuq il-konsumaturi, il-Gvern għandu l-obbligu li jew jirranġa din il-linja minnufih jew jissospendi s-servizz biex l-ebda ċittadin ieħor ma jingidem għalxejn.

Arkivji 2006-2008

Arkivji 2009