Aħbarijiet | 19 ta’ April 2009 Nr 129

€62,546 biex jitneħħa l-asbestos tal-Isptar ta’ Għawdex

Franica Pulis

F’Ottubru 2008 MaltaToday kienet ikkonfermat li fl-Isptar Ġenerali ta’ Għawdex kienu qed jistennew biex jitneħħa l-asbestos li kien hemm f’ċerti postijiet matul l-isptar.
Xahar wara ntrebaħ it-tender minn PT Matic Environmental Services Ltd għas-somma ta’ €62,546 (Lm26,850) u xogħolhom hu li jneħħu l-asbestos li twaħħal fis-sebgħinijiet biex jgħatti l-pajpijiet li ddendlu mas-soqfa. Dan jinsab fil-panelli tas-soqfa tal-kurituri, fid-Dipartiment tar-Radjoloġija, fis-CCU u fis-swali tal-Operazzjonijiet.
L-asbestos, maħsub li jista’ jikkawża l-kanċer, kien diġà tneħħa minn partijiet oħra tal-istess sptar fosthom mill-Emerġenza, mis-Sala Ġerjatrika tan-Nisa, mis-Sala tal-Maternità u l-Ġinekoloġija, mill-kwartieri tat-tobba, mill-kċina u mid-Dipartiment tal-Fiżjoterapija.
Ix-xogħol hu maħsub li jintemm fi tliet ġimgħat u jinqasam f’erba’ fażijiet skont it-taqsima. Jekk ix-xogħol ma jitlestiex fil-ħin mill-kuntrattur dan jeħel multa ta’ €466 kuljum.

Arkivji 2006-2008

Arkivji 2009