Aħbarijiet | 05 ta’ April 2009 Nr 126

Fenech Adami ma rebaħx qalb il-Laburisti

James Debono

Stħarriġ tal-gazzetta Illum juri li waqt li 46% jaħsbu li Fenech Adami rnexxielu jgħaqqad lill-poplu Malti tul il-Presidenza tiegħu waqt li 36% huma tal-fehma li l-eks kap tal-PN ma rnexxilux jilħaq dan il-għan.
Il-Presidenza ta’ Fenech Adami ntemmet din il-ġimgħa bil-ħatra tal-President George Abela li tgawdi l-appoġġ ta’ 85% skont stħarriġ li sar minn din il-gazzetta f’Jannar.
Fost dawk li vvutaw lill-Partit Laburista fl-elezzjoni ġenerali li għaddiet 71% jaħsbu li l-eks Kap tal-Partit Nazzjonalista ma rnexxilux jgħaqqad lill-poplu. Kienu biss 13% tal-Laburisti li sostnew li Fenech Adami rnexxielu jilħaq dan il-għan.
Min-naħa l-oħra, minkejja l-popolarità li jħaddan Fenech Adami fost in-Nazzjonalisti, 20% tal-votanti Nazzjonalisti wkoll jaħsbu li l-eks kap tal-partit ma rnexxilux jgħaqqad lill-poplu.
Din hi indikazzjoni li parti tal-elettorat Nazzjonalista kienet iddarrset bil-ħatra ta’ Fenech Adami bħala President eżatt wara li ċeda postu bħala Kap tal-Partit lil Lawrence Gonzi.
L-istħarriġ sar fost 300 persuna li ġew ikkuntattjati bejn nhar l-Erbgha 25 ta’Marzu u nhar il-Ħamis 2 ta’April.

Arkivji 2006-2008

Arkivji 2009