Aħbarijiet | 18 ta’ Jannar 2009 Nr 116

L-aħħar siġar taċ-ċawsli fi Pjazza Mesquita

Franica Pulis
fpulis@mediatoday.com.mt

Din il-ġimgħa numru ta’ residenti lmentaw minħabba li tqaċċtet siġra taċ-ċawsli fi Pjazza Mesquita fl-Imdina li kienet eżattament quddiem l-iMdina Experience. B’kollox minn dawn is-siġar kien fadal tlieta biss u kienu nżergħu fi żmien l-Ingliżi fis-seklu 19 għad-dud tal-ħarir biex jgħinu l-industrija tal-ħarir. Issa kulma fadal huma żewġ siġar għarwiena mill-weraq tant kemm inżabru b’mod feroċi.
Wara rapport li għamilna mal-MEPA kelliem għall-MEPA weġibna li xi uffiċjali għamlu spezzjoni fuq il-post. Hemmhekk sabu li siġra taċ-ċawsli (Morus species) kienet qed tinqata’ f’biċċiet u titneħħa mill-pjazza. Mill-investigazzjoni li għamlu ħareġ li s-siġra kienet attakkatha minn susa tal-għeruq (wood boring beetle jew phryneta lebrosa) li dgħajfet lis-siġra.
Il-kelliem żied jgħid: “Is-siġra dgħajfa waqgħet bl-irjiħat qawwijin li kellna din il-ġimgħa. Għalhekk il-Kunsill Lokali tal-Imdina qabbad kuntrattur biex ineħħi s-siġra. Għalkemm is-siġar taċ-ċawsli hu mniżżel fir-Regolamenti tal-2001 dwar il-Ħarsien tas-Siġar u l-Imsaġar li jiddikjarawhom protetti, f’dan il-każ is-siġra tqaċċtet b’kawżi naturali. Għalhekk ma kellha tittieħed l-ebda azzjoni.”
Mhux magħruf jekk il-Kunsill tal-Imdina kienx avża lill-MEPA li kienet se titneħħa s-siġra u lanqas intalabx permess biex ineħħi s-siġra protetta. Mhux magħruf lanqas jekk il-kunsill għandux ħsieb jiżra’ siġra taċ-ċawsli oħra biex tieħu post dik li tqaċċtet.
Dawn il-mistoqsijiet xtaqna nagħmluhom lill-Kunsill iżda kien tard wisq peress li s-Sibt ma jiftaħx.