Ittri | 18 ta’ Jannar 2009 Nr 116

Għal min jifhimha

Mark Sammut,
President, Għaqda tal-Malti, Università

Il-gazzetta tiegħek l-oħra stampata mill-istess kumpanija għażlet li tiftaħ attakk aħrax fuq wieħed mill-premjijiet għall-Ktieb 2008. Dan l-attakk assolutament ma kienx meħtieġ u lanqas ma kien ġustifikat.
Dan jingħad fid-dawl tal-ittra ta’ Sergio Grech, Uffiċjal tal-Kunsill Nazzjonali tal-Ktieb, li kixfet l-iskopijiet ulterjuri b’mod ċar.
L-Għaqda tal-Malti tal-Università ltaqgħet mal-familja Bonnici u għadditilhom it-trofew li rebħu x-xogħlijiet ta’ missierhom. Il-familja Bonnici kienet tal-fehma li l-flus tal-premju għandhom jibqgħu għand l-Għaqda li waqqaf missierhom biex jitkompla x-xogħol fejjiedi li beda hu favur l-ilsien Malti.
Kontu mgħaġġlin wisq fl-attakki tagħkom għax ma tajtu ċans lil ħadd jaġixxi. Naturalment, l-ittra ta’ Grech tispjega ħafna xorti, u hi ħasra li min jaspira li jkun intellettwali jaqa’ fil-bassezzi li hemm imsemmija fl-ittra ta’ Grech.