Aħbarijiet | 11 ta’ Jannar 2008 Nr 115

L-HSBC ma jridx jikkummenta wara li għolla t-tariff

Din il-ġimgħa l-Bank HSBC daħħal piż ġdid fuq il-konsumaturi tiegħu li jużaw l-internet banking.
It-tariffa hi ta’ €6 u skont il-bank din iddaħħlet għaliex żdiedulu l-ispejjeż biex iħaddem is-servizz.
Din il-gazzetta staqsiet lill-bank kemm hi l-ispiża li qed jgħid li żdiditlu u kemm fir-realtà għandu persuni li jużaw is-servizz tal-internet.
Kelliem għall-bank sostna li “l-HSBC jikkunsidra n-natura tad-domandi bħala informazzjoni kummerċjali li ma tistax tingħata.”
Il-bank qed jirrifjuta wkoll li jipprovdi lill-qarrejja bil-lista tal-prezzijiet għal dan l-istess servizz lill-klijenti tal-HSBC f’pajjiżi oħra. B’dan il-mod konsumatur Malti jkun jista’ jara x’għamel il-bank barra minn Malta.
L-Awtorità għas-Servizzi Finanzjarji għadha ma weġbitx mistoqsijiet li bgħatnielha din il-ġimgħa b’rabta ma’ din il-każ.