Ittri | 09 ta’ Novembru 2008 Nr 106

Il-baġit ta’ Gatt u l-baġit ta’ Fenech

Minn Joseph Bonnici,
Ħaż-Żabbar

Il-Ministru tal-Finanzi insista li t-tariffi tad-dawl u l-ilma mhumiex materja ta’ baġit. Għalija ma tagħmilx differenza jħabbarhomx qabel, waqt jew wara l-baġit għax li naf hu li bħal eluf ta’ nies oħra se nkun qed inħallas ferm iktar għall-kontijiet.
Il-verità hi li l-poplu se jara ħafna inqas flus fil-but minħabba l-kontijiet m’ogħla s-smewwiet li diġà beda jħallas.
L-inqas li seta’ jagħmel Tonio Fenech kien li fil-baġit jirrikonoxxi l-piżijiet akbar li ntefgħu fuq il-poplu fil-‘baġit’ ta’ Austin Gatt ġimgħa qabel u jikkumpensa lin-nies imqar għal sena waħda.
Bejn il-baġit ta’ Gatt u dak ta’ Fenech il-poplu mar lura mhux ’il quddiem. Kemm nixtieq li għadna lejlet l-elezzjoni għax dakinhar il-kliem kien għal kollox differenti. Il-finanzi kienu fis-sod, kien qed iwiegħed iktar flus fl-idejn, iktar xogħol u xogħol aħjar u l-affarijiet kellhom jibqgħu jwarrdu taħt il-Gvern Nazzjonalista.
Wisq nibża’ li llum qed inbatu għax il-Gvern kien ħali u mhux għaqli fl-infiq tiegħu lejlet l-elezzjoni.
M’hemmx x’tagħmel. Ikolli nbati għal tliet snin. Imbagħad nagħmel sena fejn ma jiżdidulix il-piżijiet u lejn l-aħħar sena l-Gvern jerġa’ jiftaħ idejh forsi jkun imissni xi ħaġa. Dan hu ċ-ċiklu miskin tal-politika Nazzjonalista.