Aħbarijiet | 13 ta’ Lulju 2008 Nr 89

“Mhux se nerġa’ lura fil-politika”

Julia Farrugia

Joe Saliba, eks Segretarju Ġenerali tal-Partit Nazzjonalista, jeskludi kull possibbiltà li jikkontesta l-elezzjonijiet għall-Parlament Ewropew.
F’kummenti lil din il-gazzetta Joe Saliba jsostni li “dan hu żmien li nkun viċin il-familja tiegħi. Ħriġt mill-politika u min joħroġ
mill-politika ma jerġax lura,” saħaq Saliba.
“Tajt ħafna lill-Partit u m’għandix dispjaċir. Imma issa hemm bżonn li ngħix ħajti.”
F’dawn l-aħħar ġimgħat imkejjen differenti kienu qed irewħu l-idea li Joe Saliba se jkun wieħed mill-kandidati tal-Partit Nazzjonalista għall-elezzjonijiet tal-Parlament Ewropew. Saliba għadu jgawdi l-appoġġ ta’ ħafna u ismu fuq il-lista tal-Partit Nazzjonalista jista’ jżid in-numru ta’ kandidati li jtella’ l-PN fl-elezzjonijiet ta’ Ġunju li ġej.
Iżda l-eks Segretarju Ġenerali tal-PN, li okkupa s-siġġu jaħraq għal 10 snin, jiddeskrivi din il-possibiltà bħala “invenzjonijiet tan-nies,” u eskluda li ismu se jkun fuq il-lista.
Jidher li Joe Saliba għadu qed jiżen l-għażliet kollha li għandu quddiemu dwar l-impjieg il-ġdid tiegħu.
Mistoqsi jekk hux sejjer lura l-Università fejn l-impjieg tiegħu għadu miżmum sa llum, jew inkella hux se jmur jaħdem ma’ kumpanija privata, Joe Saliba saħaq li għadu ma ħax deċiżjoni.
“Għandi xahrejn għall-kwiet imbagħad wara niddeċiedi. Imma għandi bżonn naħdem biex ngħix,” saħaq Saliba mingħajr ma żvela x-xewqat tiegħu.