Aħbarijiet | 22 ta’ Ġunju 2008 Nr 86

Nittama li l-Gvern ma jagħmilhiex ta’ broker għax-xerrejja – Marlene Mizzi

Sabrina Agius

Filwaqt li l-ħaddiema tat-Tarzna huma demoralizzati bl-aħbar li l-Gvern se jipprivatizza l-kumpanija u fl-istess waqt inaqqas l-għadd ta’ impjegati, l-eks chairman tas-Sea Malta Marlene Mizzi tenniet it-tama tagħha li f’dan il-każ il-gvern ma jagħmilhiex ta’ “broker għax-xerrejja bħalma ġara fil-każ tas-Sea Malta.”
Mizzi ntalbet minn din il-gazzetta biex tagħti l-ewwel reazzjoni tagħha għat-tħabbira tal-Gvern li se jibda l-proċess ta’ privatizzazzjoni ta’ l-azjenda li tħaddem ma’ l-1,700 ruħ.
L-eks chairman tas-Sea Malta esprimiet ukoll it-tama li jekk kien hemm xi studji li saru biex it-tarznari jkunu salvati “dawn ma ġewx injorati bħalma ġara fil-każ tas-Sea Malta.”
Min-naħa l-oħra, l-ekonomista Lino Spiteri ikkritika l-Gvern għax ma ikkonsultax qabel ma ħa d-deċiżjoni.
“Mhux ċar x’qed jipproponi l-Gvern. Li hu żgur hu li missu ħa l-problema b’mod differenti. Kien ikun aħjar li kieku ikkonsulta qabel ħa d-deċiżjoni tiegħu,” qal Spiteri.