Aħbarijiet | 15 ta’ Ġunju 2008 Nr 85

Naqsu dawk li jieklu barra

James Debono

L-għafsa fuq il-bwiet tal-familji minħabba l-għoli tal-ħajja qed twassal biex iktar nies jissagrifikaw wieħed mill-ftit kapriċċi tal-ħajja: dak li joħorġu jieklu barra mal-familji tagħhom.
Stħarriġ li sar f’Settembru tas-sena li għaddiet mill-gazzetta MaltaToday kien juri li 37.4 fil-mija qatt ma jmorru jieklu f’ristorant. Disa’ xhur wara stħarriġ tal-gazzetta Illum juri li n-numru ta’ dawk li qatt ma joħorġu jieklu barra żdied b’7 fil-mija u issa laħaq il-44.4 fil-mija.
Dan juri li l-għoli tal-ħajja li qed iħossu t-93 fil-mija tal-Maltin mhux biss qed iwassal għal għafsa fuq il-but iżda wkoll għal tnaqqis fil-kwalità tal-ħajja.

Għal ħafna familji Maltin ikla f’ristorant tfisser mument ta’ serħan wara ġimgħa xogħol.
L-iktar tnaqqis sinifikanti seħħ fost dawk li kienu joħorġu jieklu barra darba fil-ġimgħa li naqsu minn 16.8 fil-mija għal 10.6 fil-mija. Din hi indikazzjoni ċara li l-klassi tan-nofs qed issofri l-għafsa wkoll.
Jidher li din il-kategorija xorta għadha tiekol barra iżda qed tagħmel dan inqas ta’spiss.
Fil-fatt, għalkemm dawk li jieklu barra globalment naqas b’7 fil-mija, dawk li joħorġu jieklu darba fix-xahar jew darba kull ħmistax baqa’ l-istess.
Filwaqt li sebgħa fil-mija ma baqgħux jieklu barra, sitta fil-mija qed jieklu barra inqas ta’spiss minn qabel.
L-istħarriġ ukoll jikkonferma li minkejja l-għafsa fuq il-bwiet għad hawn kategorija soċjali li għadha tgħix tajjeb ħafna. In-numru ta’dawk li joħorġu jieklu barra iktar minn darba fil-ġimgħa żdied minn erba’ fil-mija għal 4.6 fil-mija.