Aħbarijiet | 11 ta’ Mejju 2008 Nr 80

Austin Gatt b’sejba ta’ tpinġija antika

Julia Farrugia
jfarrugia@mediatoday.com.mt

Il-Ministru Austin Gatt irnexxielu jagħmel skoperta differenti grazzi għal ħsieb tiegħu li jkollu uffiċċju akbar fil-Parlament. Illum tista’ tikkonferma li l-Ministru Gatt beda missjoni biex iniffed l-uffiċċju tiegħu ma’ dak li qabel kien l-uffiċċju ta’ Helen D’Amato.
F’din il-ħidma kellhom jitneħħew panelli ta’ l-injam u unit qadim li mas-snin tpoġġew hemm biex jaqsmu s-sala f’żewġ uffiċċji biex b’hekk issa l-kamra ġiet fl-istat oriġinali tagħha.
Fost ix-xogħlijiet li saru jirriżulta li tneħħew erba’ soqfa foloz li kienu jgħattu s-saqaf oriġinali li jistrieħ fuq il-ħnejjiet. Dawn is-soqfa, tnejn ta’ l-injam u tnejn tal-Jablo, kienu jgħattu metri twal ta’ cables u mains switches li ma kinux jintużaw. Kien f’dan l-istadju li kif inkixef is-saqaf oriġinali nkixfu wkoll dekorazzjonijiet antiki mpittra bl-idejn.
Kelliem għall-Ministru Austin Gatt ikkonferma li x-xogħol ta’ restawr f’dan il-proġett ġie jiswa anqas minn €19,000 (Lm8,156.70). Ir-restawr kollu qed isir taħt is-superviżjoni tat-Taqsima tar-Restawr. Uffiċjal tal-Mepa segwa dan ix-xogħol mill-qrib u f’diversi stadji saru konsultazzjonijiet mas-Sovratendent tal-Patrimonju Kulturali.
L-istess kelliem sostna ma’ din il-gazzetta li “minħabba li ma kinux qed isiru alterazzjonijiet strutturali ma kienx hemm bżonn ta’ permessi tal-bini biex sar dan ix-xogħol.”