Aħbarijiet | 11 ta’ Mejju 2008 Nr 80

L-eżamijiet tal-Junior Lyceum qed joħolqu ħafna stress fuq it-tfal

Sabrina Agius
sagius@mediatoday.com.mt

Il-Professur Kenneth Wain u l-psikologa Jo Christina Scicluna jsostnu li l-eżamijiet tal-Junior Lyceum m’għadx baqa’ lokhom u li dawn qed joħolqu stress kbir fuq it-tfal.
Mejju hu x-xahar fejn jibda l-bnazzi iżda għal bosta tfal Maltin u Għawdxin jibda bi sħaba sewda sakemm jgħaddi l-ħmar il-lejl ta’ l-eżamijiet tal-Junior Lyceum.
Ftit tasal tobsor kemm is-sistema edukattiva Maltija tasal biex tikkawża nkwiet u stress żejjed mhux biss fuq it-tfal iżda wkoll fuq il-ġenituri tagħhom.
Illum staqsiet lill-Professur Kenneth Wain li jgħallem fil-Fakultà ta’ l-Edukazzjoni fl-Università ta’ Malta jekk jaħsibx li tagħmel sens li t-tfal ikollhom din ix-xorta ta’ piż fuqhom minħabba l-eżamijiet tal-Junior Lyceums.
“Il-kunċett ta’ Junior Lyceum m’għadx hemm loku. Bħala kunċett jagħmel ħafna deni u ma jagħmel ġid ta’ xejn. Li jkollna skejjel primarji u warajhom ikollna skejjel tal-Junior Lyceum hi sistema li ma tagħmilx sens. Il-problema qiegħda fuq żewġ livelli.
L-ewwel waħda hi li l-Kurrikulu Nazzjonali jitkellem fuq ġustizzja, meta għandek il-Junior Lyceum li jmur proprju kontra dan il-kunċett. It-tieni punt hu dak ekonomiku għax ma jagħmilx sens meta qed nitkellmu għal edukazzjoni għall-ħajja.”
Mistoqsi x’riforma hemm bżonn biex ikollna sistema edukattiva aħjar Wain wieġeb li “fid-dinja ta’ llum fejn qed ngħixu f’soċjetajiet fejn il-kompettitività hi daqshekk importanti ma jagħmilx sens li t-tfal nibdew nagħżluhom minn età kmieni u tibda tagħżilhom fejn qisek qed tgħidilhom ‘intom tistgħu tirnexxu u inthom le’. Sempliċiment għandhom ineħħu l-eżamijiet. Għandu jkollna sistema waħda sekondarja. Għandu jispiċċa wkoll l- streaming bejn il-Primarja u l-livell Sekondarju. Għandu jkun proċess naturali u ma għandux ikun hemm selittività. Kulħadd għandu jibqa’ għaddej.”
B’konformità ma’ Wain, Jo Christina Scicluna li tkellmet magħha din il-gazzetta, qablet li s-sistema edukattiva Maltija għat-tfal mhix waħda li taġevola l-istress tat-tfal.
Saħqet li “l-eżami tal-Junior Lyceum bil-kontenut u l-istil li fih illum, qed jikkawża stress kbir fit-tfal tagħna. Li tagħmel minn dan l-eżami l-“benchmark” ta’ suċċess jew le għal numru kbir ta’ tfal hi xi ħaġa tal-mistħija f’pajjiż ċivilizzat. Ħafna mill-materjal li jiġi mgħallem hu minsi, għax hu inutli u mhux applikabbli għall-ħajja tat-tfal tagħna. Mhux qegħdin ngħallmu lit-tfal jaħsbu jew jittrasferixxu t-tagħlim għall-ħajja tagħhom, il-kunċett l-iktar vitali fejn tidħol il-psikoloġija
tat-tagħlim.”
Għalkemm qablet li l-Junior Lyceum iġib ċertu stress u jżid l-ansjetà żiedet tgħid li “l-eżamijiet fihom infushom mhumiex kunċett ħażin jew negattiv. Meta t-tfal ipoġġu għal eżami, jiffaċċaw ċertu livell ta’ ansjetà, li hi parti mill-fatt li int ħaj u qiegħed taffronta sitwazzjonijiet f’ħajtek li jistgħu jikkawżaw stress, sitwazzjonijiet li mhux dejjem ikunu pjaċevoli. Sfortuntament, din hi parti mill-ħajja u t-tfal iridu jkunu mgħallma li f’ħajjithom se jkollhom jiffaċċaw ċirkustanzi li jistgħu joħolqu ċerta ansjetà.”
Jo Christina Scicluna sostniet li dan il-punt jieħu importanza akbar meta wieħed jikkunsidra li fil-ħajja tagħhom futura, speċjalment jekk ikomplu l-istudji, li jpoġġu għal eżami, se jkun vitali f’xi punt jew ieħor.
“Hu iktar faċli li tiffaċċa sitwazzjoni li int familijari magħha milli waħda aljena għalik. Għalhekk eżami fit-tfal jista’ jippreparahom għal futur li żgur se jġib miegħu sfidi akbar.
“Irridu noħolqu kultura fejn it-tfal ikunu assessjati, iva, minħabba l-importanza ta’ li tkellimt fuqu hawn fuq. Imma l-‘assessment’ ikun wieħed li huwa riflessjoni tal-ħajja li qed ngħixu fiha llum, li jkabbar mhux ikisser lit-tfal tagħna, u li jirrispettahom ta’ individwi b’ħiliet differenti tagħhom,” kompliet il-psikologa.
“B’hekk it-tfal tagħna joħorġu mill-iskola bi stima tajba tagħhom infushom u b’imħabba lejn it-tagħlim, lesti biex jiffaċċaw dinja li hi sfida kontinwa.”
Illum tkellmet ukoll ma’ xi ġenituri minn Birżebbuġa li t-tfal tagħhom qed jagħmlu l-eżamijiet tal-Junior Lyceum. Victoria Cassar qalet li “l-eżamijiet għandhom isiru imma t-tfal m’għandhomx jiġu eżaminati biss fuqhom. Għandu jkollhom pereżempju portfolio minn Year 4 jew 5 u jiġu eżaminati fuqu wkoll.”
“Jien ma naqbilx ukoll li m’għandhomx resits. Għax din mhix sistema. Għaliex m’għandux ikollhom resists?” qalet Doreen Micallef, omm oħra li tkellmet magħna.