Aħbarijiet | 11 ta’ Mejju 2008 Nr 80

Bierku s-swali biex igerrxu lil Satana

Twelid iġib ‘pandemonju’ fil-Mater Dei

Julia Farrugia

Twelid ta’ tarbija fil-Mater Dei nissel terrur fost numru ta’ ħaddiema li kienu xogħol f’dan l-isptar. Dan għaliex beda jingħad li t-twelid kellu konnessjonijiet Sataniċi. F’dan il-każ kellu saħansitra jintervjeni saċerdot li bierek il-postijiet kollha li fih kienet l-omm qabel, waqt u wara li welldet lit-tarbija.
Informazzjoni li għandha din il-gazzetta tikkonferma li l-ġimgħa l-oħra omm li kienet qed tistenna tarbija ddaħħlet il-Mater Dei. Matul l-istennija tagħha l-mara kemm-il darba nstemgħet titkellem fuq is-Sataniżmu. Meta f’ħin minnhom wasal ħin it-tqarbin il-mara bdiet tgħajjat mas-saċerdot u ordnatlu biex ma jidħolx fis-sala għaliex hi kienet “pagana”.
Nies li raw lil din il-mara sostnew li minbarra l-imġiba tagħha kien hemm affarijiet oħra li qanqlulhom tħassib fosthom tpinġija li kellha l-mara fuq ġisimha. Din it-tpinġija turi stilla bil-ħames ponot li normalment hi marbuta mas-Sataniżmu.
F’ġurnata oħra l-mara jidher li biddlet fehemtha u talbet li titqarben. Madankollu t-talba tagħha ma ntlaqgħetx.
Dawn il-fatturi wasslu biex wieħed mill-patrijiet ta’ l-isptar ta salib lill-ħaddiema li kienu qed jassistu lill-omm waqt it-twelid.
Kompla qanqal aktar tħassib il-fatt li l-koppja iddeċidiet li ssemmi lit-tifel ‘Lucian’ li jfisser ‘dawl’. L-isem ‘Luċifru’, li normalment jintuża wkoll għal Satana, għandu wkoll tifsira ta’ ‘persuna li ġġib id-dawl’. Hu wkoll referenza għall-alla pagan li jġib l-għarfien u d-dawl.
Sorsi fl-Isptar Materdei ikkonfermaw ma’ Illum li ftit wara li l-omm telqet mill-isptar patri mar ibierek it-teatru fejn welldet il-mara kif ukoll is-swali ta’ fejn kienet qed tinżamm qabel u wara t-twelid.