Ittri | 11 ta’ Mejju 2008 Nr 80

Valuri li jiddistwinguna

John M Briffa,
UHM

It-twaqqif tal-UHM 42 sena ilu kien mela vojt li kien ilu jinħass f’pajjiżna. Kienet twaqqfet trade union li l-valuri li kienet temmen fihom kellhom il-pedamenti u l-għeruq soċjali u nsara li kienu biċċa waħda ma’ l-għeruq tal-poplu tagħna.
Dawn il-valuri li ħaddnet u għadha tħaddan il-UHM iħarsu lejn il-ħaddiema bħala bnedmin sħaħ. Mhux biss biex ikollna soċjetà mibnija fuq il-ġustizzja soċjali u fuq il-liberta imma wkoll biex ikollna żvilupp sostenibbli li jħares bl-aktar mod tanġibbli l-ambjent, jinħoloq ix-xogħol u jkollna ħaddiema mgħallma u mħarrġa fil-ħiliet li verament jirrispettaw il-ħaddiema, pensjonanti u l-familji tagħhom.
Dan ma jfissirx li warrabna l-bżonnijiet tal-ħaddiema fuq il-postijiet tax-xogħol. Anzi konna fuq quaddiem biex dejjem stinkajna sabiex intejbu l-qagħda tal-ħaddiema. Kemm biex il-ħaddiema jkollhom livell ta’ għixien dejjem aħjar. Kemm biex ikollhom ambjent ta’ xogħol mill-aħjar.
Dan narawh illum bin-numru kbir ta’ ftehim kollettivi li nagħmlu u kif ukoll b’modi oħra. Il-kampanja ta’ Saħħa u Sigurtà li qed tmexxi bħalissa l-UHM hi xhieda ta’ dan.
Illum il-ħaddiema, il-pensjonanti u l-familji tagħhom għandhom diversi għażliet quddiemhom.
L-għażla li tqarribhom lejn dak it-twemmin li dejjem sawwar il-qalb u r-ruħ tal-poplu tagħna. Żgur li fiż-żmien li ġej aktar ħaddiema u pengjonanti ser iħarrsu lejn din il-għażla u jagħmluha tagħhom.