Aħbarijiet | 11 ta’ Mejju 2008 Nr 80

Politika ta’ kunsens

George Abela
www.georgeabela.info

Fi żminijiet ta’ llum ma nistgħux nevitaw li naħdmu flimkien u allura nħaddnu l-politika tal-kunsens. B’politika ta’ kunsens nifhem li kull deċiżjoni politika li tittieħed irid ikollha l-appoġġ ta’ l-ikbar firxa possibbli fis-soċjetà. Trid tkun politika li titfassal wara konsultazzjoni effettiva ma’ min hu konċernat jew interessat.
B’politika ta’ kunsens ma nifhmux li hi politika tad-dgħjufija. Li l-ħin kollu rridu nċedu u nakkomodaw lil ħaddieħor b’faċilità iktar milli ninħtieġu biex inwasslu l-politika tagħna. Meta nitkellmu dwar politika ta’ kunsens inkunu nfissru li kemm jista’ jkun il-viżjoni tagħna, id-direzzjoni li nagħtu u l-ħidma li nagħmlu jridu jwasslu biex jinkisbu r-riżultati mixtieqa.
Irridu nisimgħu lilna nfusna. Nixtarru l-ħsibijiet li joħorġu mill-istrutturi interni tagħna. Nikkritikaw lilna nfusna, għaliex le? U nifformulaw il-linja li nkunu se nieħdu mbagħad niddibattu ma’ oħrajn. Fejn tinħass il-ħtieġa li nimmodifikaw wara d-diskussjonijiet li nagħmlu allura nbidlu kemm hemm bżonn. Minn hemm ’il quddiem id-deċiżjoni li tittieħed tkun torbot lil kulħadd u kollha kemm aħna rridu niddefendu l-pożizzjoni li jieħu l-Partit.
Dan jgħodd għar-responsabbilità li għandna bħala Oppożizzjoni. Irridu nagħmlu dan biex nuru li aħna verament Partit inklussiv, li nemmnu f’parteċipazzjoni iktar wiesgħa u li rridu nipprattikaw stil ta’ tmexxija li jwassal għal għaqda. Ma jfissirx li se nagħmlu kompromessi mal-prinċipji li nħaddnu. It-twemmin u l-prinċipji tagħna jridu jibqgħu jiggwidawna f’kulma nagħmlu. It-twemmin u l-prinċipji tagħna la huma għall-bejgħ u lanqas għat-tpartit.
Lanqas mhi politika ta’ kompromessi. Fil-miri tagħna aħna ma rridux nilħqu livelli inferjuri. Irridu l-aqwa u l-aħjar f’dak li nipproponu, f’dak li nwiegħdu u f’dak li nwettqu. Il-politika ta’ kunsens, meta mħaddma tajjeb, tiggarantixxi l-kredibbiltà, il-kontabbiltà u s-serjetà. B’dan il-mod jirnexxielna nkomplu nkabbru l-appoġġ lejn il-Partit tagħna u żgur li tiżdied il-fiduċja ta’ l-elettorat. Il-politika ta’ kunsens tagħna ma tkunx waħda finta, partiġġana jew artifiċjali – bħalma jrid jipprova jwettaq il-Partit Nazzjonalista fil-Gvern illum.
Id-deċiżjonijiet mgħaġġla u bla konsultazzjoni ta’ xejn li ħa l-Gvern mill-għada ta’ l-elezzjoni ’l hawn huma biżżejjed biex jikxfu l-ingann ta’ min irid jagħtik ewro biex jeħodlok 10. Aħna ma naħdmux hekk. Aħna nemmnu f’dak li nwettqu u għalhekk magħna kulħadd ikun jaf fejn hu qiegħed. Mhemmx ħabi u m’hemmx logħob bil-bżallu. Aħna lesti naħdmu ma’ kulmin għandu rieda tajba. Il-politika tal-kunsens hi msejsa fuq l-intelligenza tal-moħħ iktar milli fuq emozzjonijiet tal-qalb. Il-politika tal-kunsens hi politika li tħalli r-riżultati.Politika effettiva li biha nkunu qegħdin ninvestu fit-tul. Politika li lilna Laburisti tiddistingwina mill-oħrajn. Politika li terġa’ tpoġġina fuq quddiem nett tal-lista tal-partiti progressivi u pożittivi.