Aħbarijiet | 04 ta’ Mejju 2008 Nr 79

L-Eżekuttiv jipprova jfittex ‘il-widna’

Kurt Sansone

Membri ta’ l-Eżekuttiv Nazzjonali tal-Partit Laburista nhar il-Ġimgħa filgħaxija spiċċaw jiddiskutu ż-żewġ stejjer li kellha din il-gazzetta l-Ħadd li għadda li żvelaw il-minuti ta’ l-Eżekuttiv li fl-1998 iddeċieda fuq elezzjoni bikrija u ittra personali li l-eks kandidat Laburista Alfred Mifsud kien bagħat lil Alfred Sant biex iwissih dwar George Abela u Dom Mintoff.
Jidher li xi wħud, fosthom is-Segretarju Ġenerali Jason Micallef, dawru l-kanuni tagħhom fuq persuna li ilha żmien twil tieħu l-minuti fl-eżekuttiv.
Din il-persuna, fi stat emozzjonali kbir, ċaħdet kategorikament li kienet hi li wasslet il-minuti lil din il-gazzetta.

Minkejja kull tentativ, kultant anki b’lingwaġġ xejn dinjituż minn xi wħud mill-membri preżenti, biex din il-persuna tammetti li kienet hi li ħarġet l-informazzjoni, din baqgħet tiċħad.
Intant l-eżekuttiv iddiskuta wkoll il-petizzjoni li tressqet quddiemu mid-deputat Marlene Pullicino biex tissejjaħ konferenza ġenerali straordinarja ħalli tiddeċiedi jekk it-tesserati għandhomx jingħataw id-dritt ukoll biex flimkien mad-delegati jivvutaw għall-ħatra ta’ mexxej.
Il-petizzjoni kienet iffirmata minn 122 delegat, ftit iktar mill-minimu ta’ 10 fil-mija (madwar 90) mitlub mill-istatut. B’kollox l-MLP għandu madwar 900 delegat.
L-eżekuttiv qabel li l-konferenza ġenerali ssir nhar il-Ġimgħa li ġej, inqas minn xahar bogħod mill-elezzjoni tal-mexxej il-ġdid li se ssir fil-5 ta’ Ġunju.
Minn ħin għall-ieħor hu mistenni li l-proponenti tal-petizzjoni jippreżentaw formalment il-mozzjoni fejn jispeċifikaw x’bidliet jixtiequ jaraw fl-istatut u li se tkun diskussa fil-konferenza ġenerali.
Il-petizzjoni kienet titkellem biss fuq bidla fil-mod kif jinħatar il-mexxej u mhux fuq kif jinħatru d-deputati mexxejja.
Alfred Sant, li fl-aħħar laqgħa tal-Grupp Parlamentari kien tfaċċa għall-għarrieda, ma kienx preżenti għal-laqgħa ta’ l-eżekuttiv.