Aħbarijiet | 04 ta’ Mejju 2008 Nr 79

Oppożizzjoni organizzata u b’saħħitha

Marie-Louise Coleiro-Preca
www.marielouise.info

Jinħtieġ li l-Partit Laburista jkun Oppożizzjoni organizzata u b’saħħitha.
Wasal iż-żmien li l-Parlament Malti jkun tassew Parlament demokratiku. Sa llum l-operat organizzattiv tal-Parlament hu wieħed mill-aktar żbilanċat u dilettantesk, fejn il-Gvern għandu r-riżorsi kollha biex jaħdem, filwaqt li l-Oppożizzjoni prattikament m’għandha xejn.
Hi tal-mistħija li l-Oppożizzjoni la għandha spazju biżejjed minn fejn taħdem, u wisq anqas għandha r-riżorsi materjali u umani biex tagħmel xogħolha fil-Parlament b’mod professjonali. Dan meta ħidmet il-Parlament żdiedet minħabba li fost affarijiet oħra, iridu jsiru eżeċizzji regolari ta’ skrutinju ta’ proposti għal regolamenti u direttivi li jintbagħtu mill-Kummissjoni ta’ l-Unjoni Ewropea.
Għalhekk jinħtieġ li l-Partit Laburista jagħmel proposti immedjati lill-Ispeaker u lill-Gvern biex ir-riżorsi meħtieġa jingħataw lill-Oppożizzjoni. In-nuqqas ta’ riżorsi li hemm fil-Parlament mhux darba u tnejn kienu l-qofol ta’ diskorsi li l-Ispeaker, Anton Tabone, għamel matul is-snin.
Iżda l-Gvern Nazzjonalista li hu responsabbli li jagħti r-riżorsi biex il-Parlament jiffunzjona professjonalment kif xieraq dejjem injora dawn l-appelli. Għalhekk żgur li wasal iż-żmien li l-Partit Laburista jinsisti u jkun iebes fuq it-talbiet leġittimi tiegħu, biex bħala Oppożizzjoni jkun f’qagħda li jaħdem tabilħaqq fl-aħjar interess ta’ pajjiżna.
Min-naħa l-oħra fuq livell politiku jinħtieġ li l-Oppożizzjoni Laburista tkun oppożizzjoni assertiva b’politika msejsa fuq ideat żviluppati ħalli l-Gvern Nazzjonalista ma jibqax għaddej bl-attitudni li hu jaf kollox u ma jħallix lok għal ħidmiet kostruttivi flimkien. Il-poplu Malti qiegħed jistenna dan.
Jinħtieġ li l-Oppożizzjoni Laburista tkun oppożizzjoni li tirrifletti l-verità, fejn dak li hu tajjeb ma tiddejjaqx tgħidlu tajjeb, filwaqt li dak li hu ħażin, ikollha l-kuraġġ li tgħidlu ħażin u tieqaf fuq saqajha kontrih.
Jinħtieġ li nuru tassew li aħna Gvern alternattiv u differenti. Jinħtieġ li jkollna l-kuraġġ li nuru l-viżjoni tagħna f’kull ħin biex tinbena l-kredibbiltà tagħna mill-ġdid.
Jinħtieġ li tabilħaqq nuru li aħna differenti minn ħaddieħor u b’hekk nagħtu l-opportunità lill-poplu jagħraf min hu serju u jaf preċiż x’irid.
B’hekk nassiguraw li l-għażla elettorali tal-poplu taqa’ fuq il-Partit Laburista għax ikun magħruf għall-valuri sodi tiegħu. Valuri li jassiguraw tassew kwalità ta’ ħajja xierqa u dinjituża lill-Maltin u l-Għawdxin kollha.