Ittri | 04 ta’ Mejju 2008 Nr 79

Mara li tħobb lin-nies

Minn Joe Chetcuti,
Ħal Qormi

Iddeċidejt li nikteb din l-ittra wara li qgħadt insegwi l-attakki sfrenati li qed isiru fil-konfront ta’ Marie-Louise Coleiro, fejn qed jingħad li din il-mara kellha xi rabtiet ma’ żmien il-vjolenza. Issa anke fuq din hawn dibattitu sħiħ.
L-ewwelnett ħadd ma jista’ jaqbad u jwaddab it-tajn lejn xi partit wieħed. It-tieni, ħadd ma jista’ jipprova jħammeġ individwi għax hawn toħroġ l-aġenda ta’ min hu beżżiegħ u qed jibża’ li jista’ jitwarrab mill-fokus tal-poter.
Qabel ma nikkummenta fuq Coleiro nixtieq nagħmel domanda waħda u nixtieq risposta dwarha. Se nirreferi dwar l-allegazzjonijeit foloz u bla bażi li fis-Snin Tmenin il-Partit Laburista kellu x’jaqsam mal-bombi u l-vjolenza. Id-domanda hija waħda naturali ħafna. Jista’ xi ħadd jispjegali kif u għaliex wara li l-Partit Nazzjonalista rebaħ l-elezzjoni tal-1987 dawn il-bombi u l-vjolenza waqfu?
Inkompli fuq Marie-Louise. Għalkemm lili ma tafnix ħafna għax jien ċittadin komuni, ili nosserva l-mixja politika tagħha sa minn meta kienet Segretarja Ġenerali tal-Partit Laburista.
Irrid ngħid li dejjem niftakarha tħambaq biex inżommu l-għaqda bejnietna. Naf li mhux l-ewwel darba li hi personalment niżlet fejn kienu jsiru l-attivitajiet tal-massa biex tassigura li kollox jimxi kif suppost.
Niftakar ukoll fiż-żmien meta fuq inizjattiva personali tagħha kienet tiltaqa’ mas-Segretarju Ġenerali tal-PN (dak iż-żmien Louis Galea) biex flimkien jippjanaw il-kampanji rispettivi tagħhom bħal ngħidu aħna r-rotot mnejn jgħaddu l-karozzi biex kemm jista’ jkun jassiguraw li tinżamm l-ordni u li ħadd ma jweġġa’. Daqshekk tħobbhom lin-nies din il-mara! Nista’ nibqa’ nsemmi u ma niqafx.
Nagħlaq b’appell wieħed. Għandna bżonn nies tal-kalibru ta’ Marie-Louise Coleiro biex imexxu l-Partit Laburista għax apparti li urietna l-kapaċitajiet tagħha fl-imgħoddi, urietna wkoll li kapaċi tiġġeded maż-żminijiet. Dan nafuh għax f’kull elezzjoni dejjem żiedet il-voti tagħha żġur li dawn ma ġewx minn xi sezzjoni waħda ta’ l-elettorat.