Ittri | 04 ta’ Mejju 2008 Nr 79

Lejn partit iktar liberali

Minn Darren Marmarà,
Fgura

Wara t-telfa elettorali rridu nelenkaw l-iżbalji tal-partit tagħna, insolvuhom malajr, inbiddlu fejn hemm bżonn biex inqawwu t-tim tagħna ħalli jkun jista’ jinseġ it-twemmin Soċjalista li jeħtieġ pajjiżna.
Post il-Partit Laburista hu fil-Gvern. Malta llum hi mċaħħda minn partit li verament jemmen fis-Soċjaliżmu u għalhekk ninsabu fis-sitwazzjoni mwegħra li qegħdin fiha.
Aħna d-delegati għandna l-obbligu li nagħżlu l-aħjar. Irridu persuna li twassalna għar-rebħa li tant għandna bżonn. Iktar minn hekk irridu naraw li min ikun mexxej irid jgħaqqadna flimkien. Ma nistgħux naħdmu fi klikek. Il-partit hu ta’ kulħadd.
B’dan il-mod inkunu qed inkabbru l-familja Laburista fejn kulħadd iħossu parti mill-partit. Meta jkollok ħafna nies u tgħaraf issib il-kapaċitajiet tagħhom ikollok is-saħħa li twettaq ħafna xogħol. Bla dubju hemm ħafna xogħol xi jsir fi żmien meta tan-naħa l-oħra se jfittxu li jużaw il-poter tagħhom biex jgħaqqdu lil dawk in-nies li din id-darba ma vvutawx. Minn naħa l-oħra rridu nkunu l-Oppożizzjoni li tieqaf għall-arroganza, li tara li ħadd ma jaqa’ lura u fl-istess ħin li s-soċjetà timxi ’l quddiem, tieqaf quddiem sistema politika li temarġina lil xi faxxa tas-soċjetà.
Irridu nkunu l-partit modern li jindirizza kwistjonijiet tal-preżent. Jistgħu jinħassu ibsin imma ġaladarba jkollna t-tim magħqud ilkoll flimkien ngħarblu eżatt x’iridu n-nies u allura nfasslu l-politika tagħna biex ngħinuhom. Għandu jkollna politika dwar it-tipi ta’ familji li ghandna llum. Dwar id-divorzju, il-gays, l-immigranti irregolari u oħrajn li sa llum il-Gvern beża’ jiddiskuti.
Aħna rridu nkunu l-partit liberali li kapaċi jagħti leħen lin-nies tat-triq. Xejn m’għandu jbeżżana jekk naħdmu bil-għaqal.