Ittri | 27 ta’ April 2008 Nr 78

Dell fuq l-intenzjonijiet tiegħi

Minn Dominic Fenech,
San Ġiljan

Nirreferi għall-artiklu li deher fil-ħarġa tal-Ħadd li għadda taħt l-isem “TVM f’manuvra biex jaqta’ saqajn Muscat.”
F’dan l-artiklu Kurt Sansone ikkwotani ngħid li fil-fehma tiegħi l-Bord Editorjali tal-PBS m’għandux għalfejn jinvestiga l-operat tal-Kamra ta’ l-Aħbarijiet fejn jidħol ir-rappurtaġġ ta’ l-aħbar in kwistjoni, u li jiena noqgħod fuq il-kelma tan-news editor meta dan jgħid li s-sorsi tiegħu huma ta’ min jorbot fuqhom. Dan kollu minnu.
Iżda noġġezzjona għall-insinwazzjoni li hemm iżjed tard fl-artiklu li l-pożizzjoni tiegħi hi b’xi mod jew ieħor marbuta mal-fatt li nippreferi lil George Abela bħala Mexxej tal-Partit Laburista.
Meta ċempilli, Sansone ċċarali li qed ikellimni bħala membru tal-Bord Editorjali. Ladarba jien ma qgħadtx indurlu mal-lewża kont nippretendi li kliemi ma jitqiegħedtx b’mod li jixħet dell fuq l-intenzjonijiet tiegħi. Jew għallinqas, jekk kellu xi suspett minn dan, missu kkonfrontani bih.