Aħbarijiet | 20 ta’ April 2008 Nr 77

“M’għandna nagħtu xejn għal xejn”

Kurt Sansone
Michael Falzon qed jinsisti li l-Oppożizzjoni għandha tidħol fi ftehim ta’ pairing mal-Gvern fil-Parlament imma b’numru ta’ kundizzjonijiet.
Fost il-kundizzjonijiet Falzon qed jinsisti li jsiru riformi fix-xandir pubbliku u li titwettaq ġustizzja ma’ dawk li rebħu l-każ tagħhom quddiem l-Ombudsman u t-Tribunal għall-Investigazzjoni ta’ l-Inġustizzji.
Fl-artiklu tiegħu ta’ llum bħala parti mis-serje ta’ din il-gazzetta ‘Il-kandidati jitkellmu’, Falzon jinsisti li l-Partit Laburista “m’għandu jagħti xejn għal xejn.”

Fuq il-pairing id-Deputat Mexxej jgħid li l-MLP m’għandux iżomm il-ftehim tal-pairing sempliċiment biex ifixkel il-ħidma tal-Gvern.
“Nemmen fil-politika ta’ l-irġulija. Aħna nkunu rġiel imma l-gvern irid ukoll jimxi b’irġulija u jagħmel ir-riformi meħtieġa biex jiżgura tħaddim aħjar tad-demokrazija, fosthom fix-xandir pubbliku, fil-ħidma parlamentari nnifisha u fil-ħidma taċ-ċivil, billi fost oħrajn naħdmu flimkien fuq Whistleblower’s Act, jagħti dak li hu tagħhom lil dawk li rebħu każi quddiem l-Ombudsman u quddiem it-Tribunal għall-Investigazzjoni ta’ l-Inġustizzji u baqgħu b’xejn,” itenni Falzon.
L-ewwel deċiżjoni tal-Gvern li se tkun tinħtieġ konsultazzjoni ma’ l-Oppożizzjoni hi l-ħatra ta’ Speaker li trid issir sa meta jiftaħ il-Parlament fl-10 ta’ Mejju.