Ittri | 13 ta’ April 2008 Nr 76

Parti mit-telfa

Isem u kunjom miżmumin

Ili ħafna nagħti kontribut lis-Super One minn qabel ma beda jxandar ir-radju. Kont wieħed minn tal-bidunett flimkien ma’ Ray Azzopardi u minn jaf kemm irqadt hemm. Rajt ħafna nies ġejjin u sejrin. Hekk għandu jkun iżda kemm ilu li hemm Michael Vella Haber bħala kap ta’ l-istazzjon l-affarijiet marru mill-ħażin għall-agħar.
Mhux li tirbaħ l-awards biss jgħodd imma r-rispett lejn min kien hemm qablek u ta kontribut lill-istazzjon. Meta jien kont qed inwaħħal il-madum b’mod volontarju Vella Haber kien qed jagħmel il-flus jaqla’ s-snien.
Sfortunatament fl-istazzjon hemm distakk kbir fil-ħlas li jingħata lill-ħaddiema differenti anki jekk jagħmlu l-istess xogħol. L-istess kejl differenti ntuża wkoll meta ħarġet ordni biex kulmin kien jaħdem mal-kumpanija Where’s Everybody? kellu jieqaf mis-Super One. Hekk sar imma l-ordni ma applikatx għal kulħadd l-istess.
Imbagħad hemm il-mod kif Vella Haber daħħal membri tal-familja tiegħu jaħdmu fl-istazzjon. Miguel, it-tifel ta’ Vella Haber hu l-Kap ta’ l-IT filwaqt li t-tifla u l-mara jipproduċu Ġrajjiet Għawdex.
B’din it-tip ta’ tmexxija Vella Haber naffar ħafna Laburisti minn hemm ġew. L-umiltà u l-irġulija huma żewġ aspetti fundamentali fil-bniedem u għalhekk nappellalu biex jimxi ma’ kulħadd l-istess fiż-żmien li baqagħlu hemm.
Għandna ħafna nies validi fil-partit li jistgħu jagħtu kontribut u wara telfa bħal din hemm bżonn nies ġodda anki fl-istazzjon.
Din għandha tkun l-ewwel biċċa xogħol għall-mexxej il-ġdid. Irid inaddaf kull m’hemm fis-Super One għax huma wkoll kienu parti mit-telfa.