Ittri | 13 ta’ April 2008 Nr 76

Xi jfisser tkun Laburist

Minn Adrian Formosa Steel,
Valletta

Nixtieq inwieġeb lill-ġurnalista tiegħek li staqsiet ‘Xi jfisser tkun Laburist?’ fil-ħarġa tal-Ħadd li għadda.
Hemm differenza kbira bejn li tkun Laburist u li tivvota lill-Partit Laburista. Dan għaliex li tkun Laburist hu fil-karattru u kif iġġib ruħek fil-ħajja ta’ kuljum. Fi ftit kliem tkun Laburist fil-prinċipji tiegħek u mhux kif jippruvaw ipinġu lil-Laburisti sezzjoni tal-poplu li lanqas jixraqlu jissejjaħ Malti.
Li tiddefendi u tgħin lil min hu fil-bżonn ifisser li tkun Laburist. Li tgħid dak li tħoss ifisser li tkun Laburist. Li tkun lest tissagrifika lilek innifsek biex ma tmurx kontra l-prinċipji li temmen fihom ifisser li tkun Laburist. Li ġġib lil pajjiżek u l-poplu l-ewwel u qabel kollox ifisser li tkun Laburist.
Aħna l-Laburisti għandna passat glorjuż. Insemmi biss il-benefiċċji u d-drittijiet li ħadu jew kienu jieħdu ċ-ċittadini kollha bis-saħħa u l-ħidma ta’ gvernijiet Laburisti tal-passat. Żbalji għamilna wkoll. Min ma jagħmilx?
Id-differenza hi li tagħna hawn min ifakkarhom aktar u ta’ dan pattejna bil-kbir ħafna aktar milli kien jistħoqqilna għaliex meta tiżen kollox żġur li l-miżien ixaqleb bil-kbir lejn it-tajjeb.
Minkejja ċ-ċirkustanzi għandna preżent inkorraġġanti u nemmen li se jkollna futur b’saħħtu aktar minn qatt qabel bis-saħħa ta’ dak kollu li nemmnu fih u li jagħmilna Laburisti.
Ħadd m’għandu qatt jaħseb li jekk tkun Laburist tkun agħar minn ħaddieħor għax li tkun Laburist hu preġju kbir.