Pjazzetta | 06 ta’ April 2008 Nr 75

Reġa’ magħna l-Festival tal-Film Ewropej

Għal darb’oħra din is-sena r-Rappreżentanza tal-Kummissjoni Ewropea f’Malta se torganizza l-10 Edizzjoni tal-Festival tal-Film Ewropej li se jitnieda s-Sibt 12 ta’ April. Din is-sena l-festival magħmul mhux biss minn films mill-Istati Membri ta’ l-UE imma wkoll minn barra l-Unjoni Ewropea minħabba li din is-sena hi dik Ewropea tad-Djalogu Interkulturali.
F’din l-edizzjoni se jkun hemm varjetà ta’ films minn 22 Stat membru, inkluża Malta, kif ukoll wieħed mill-Awstralja, miċ-Ċina, mill-Eġittu u mill-Istati Uniti. Erbgħa u għoxrin film qed jiġu ippreżentati fiċ-Ċentru għall-Kreattività ta’ San Ġakbu u tnejn fit-Teatru Ċittadella f’Għawdex.
Il-Festival se jiftaħ bil-film Malti ta’ Engelbert Grech, Heroes in the Sky, li hu limitat għall-mistednin bl-invit (mhux se jsir fil-Kavallier ta’ San Ġakbu minħabba nuqqas ta’ spazju) u jispiċċa bil-film mis-Slovenja li bħalissa għandha l-presidenza ta’ l-UE.
Wara s-suċċess tas-sena li għaddiet din is-sena se jerġa’ jkun hemm lejla ta’ films qosra Maltin prodotti dan l-aħħar. Warajhom ikun hemm forum ta’ diskussjoni bil-parteċipazzjoni tad-diretturi tal-films barranin, fosthom mill-Awstrija, mill-Eġittu u minn Franza.
Il-Festival fih ukoll il-film ta’ Roberto Benigni Life is Beautiful li se jintwera lit-tfal ta’ l-iskola. Dan qed jiġi ppreżentat bil-kollaborazzjoni ta’ KRS Film Distributors Ltd. Il-film se jintwera f’żewġ għodwiet wara xulxin u wara jkun hemm workshops immexxija mill-animaturi tal-Kavallier ta’ San Ġakbu. Dan jipprovdi lit-tfal l-opportunità biex minn età bikrija jibdew isiru midħla ta’ l-apprezzament ta’ l-arti u x-xjenza taċ-ċinematografija kif ukoll jibdew jaċċettaw nies li huma differenti minnhom.
Bħal f’edizzjonijiet li saru, il-festival se jkun qed jikkontribwixxi għall-ġbir ta’ fondi għal kawża ġusta, din is-sena b’riżq id-Daniel Delicata Memorial Association li l-missjoni tagħha hi li tixtri, tagħti u/jew timplimenta oġġetti u servizzi ta’ divertiment u attivitajiet li jferrħu lit-tfal morda.
Dawk li jixtiequ jaraw film huma mħeġġa joffru donazzjoni ta’ €3 għal kull film. L-ibbukkjar diġà miftuħ. Il-fuljett ta’ tifkira tal-Festival hu disponibbli mir-Rappreżentanza tal-KE f’Malta f’Ta’ Xbiex (23425100).