Ittri | 06 ta’ April 2008 Nr 75

Tislima lil Joe Catania

Minn Malcolm Schembri,
Ħaż-Żabbar

Ngħid is-sew inħsadt bil-mewt ta’ Joe Catania. L-aħbar sirt nafha permezz tal-gazzetti.
Lil Joe nzertajt nafu ġo waħda mill-istamperiji fejn kont nagħmel xi xogħol. Kien persuna li jħobb tassew l-Istorja speċjalment dik konnessa mal-Mellieħa.
Għal xi żmien f’din l-istamperija fost ħafna pubblikazzjonijiet, kienu jiġu mitbugħa żewġ pubblikazzjonijiet tal-festa – Pubblikazzjoni tal-Parroċċa tal-Mellieħa u Pubblikazzjoni tal-Banda La Vittoria tal-Mellieħa biex ifakkru kif xieraq il-festa ta’ Marija Bambina li ssir f’dan il-lokal fit-8 ta’ Settembru.
Dawn kien jieħu ħsiebhom Joe li b’reqqa kbira kien jara li jkunu mibnija b’kitbiet li jsawru l-identità tal-post. Għadni niftakar kont tlabtu numru ta’ pubblikazzjonijiet Parrokkjali u tal-Banda La Vittoria li ħa ħsieb għaddieli u llum għadni ngħożżhom b’qalbi kollha.
Min hu midħla ta’ l-Istorja ta’ pajjiżu u l-post fejn jgħix għandu jkun apprezzat mhux biss matul ħajtu iżda anki wara mewtu.
Grazzi Joe ta’ l-imħabba li inti wrejt lejn il-Mellieħa fejn permezz tal-kitba u l-interess tiegħek lejn dan il-post li int tassew ħabbejt tajtu l-isbaħ rigal għax ħadt ħsieb ġrajjietu u wirtu. Jien kburi li sirt nafek u ltqajt miegħek u filwaqt li nsellem il-memorja tiegħek, nibqa’ niftakar fik fit-talb tiegħi.