Ittri | 06 ta’ April 2008 Nr 75

Lil min se nemmnu?

Minn Lino Ellul,
San Ġwann

Bħala kattoliku prattikanti u konvint ma nistax nifhem kif fl-intervista li saret ma Patri Hilary (Illum 23 ta’ Marzu) issemma Pilatu li ta d-daqqa ta’ ħarta lil Kristu, meta appuntu skond il-Kotba Mqaddsa d-daqqa ta’ ħarta lil Kristu ngħatat mill-għassies li kien miegħu quddiem il-Qassis il-kbir. (Ġw.18,22).
Min naħa l-oħra ma nistax nifhem għaliex, meta minn ħafna mkejjen ħafna kelliema li qed jitkellmu f’isem il-Knisja Kattolika dawn mhux qed jitkellmu ċar u tond dwar il-kawża tat-tbatija fuq il-bniedem.
Skond il-Ġenesi Alla ma ħalaqx lill-bniedem biex ibati iżda għall-kuntrarju ħalqu xbieha tiegħu bħala ħakkiem fuq il-ħolqien kollu (Ġen.1,26-28). Iżda kien il-bniedem li għax kiser il-kmand t’Alla, ġibed fuqu t-tbatija bħala kastig minn Alla b’konsegwenza tad-dnub oriġinali (Ġen.3,1-19) u loġikament ma jeżisti l-ebda misteru għall-kawża tat-tbatija kif qed jippruvaw jipperwsaduna ħafna kelliema fostna l-kattoliċi.
Lanqas ma nista’ nifhem kif xi ħadd fostna jista’ jgħidilna li Alla ġie fid-dinja biex ibati bħalma qed ibati l-bniedem biex allura l-bniedem ma jkunx waħdu fit-tbatija. Skond
il-Kotba Mqaddsa Kristu ġie fid-dinja mhux biss bħala bniedem biex ibati, imut issagrifikat fuq is-salib u jqum mil-imwiet, imma bħala l-uniku medjatur bejn Alla u l-bniedem fil-pjan tas-Salvazzjoni (1Tim.2,5-7) u biex allura jeħlisna mill-ħakma tax-xitan.
Jekk aħna l-kattoliċi se nkomplu nisimgħu ħafna ineżattezzi u ħafna kontradizzjonijiet għal dak li jgħidu l-Kotba Mqaddsa kif qatt jistgħu ħafna kattoliċi li m’għandhomx tagħlim profond, jemmnu li Alla jħobbhom, meta dawn jinsabu taħt it-toqol tas-slaleb tal-ħajja?
Kif qatt jistgħu ħafna minn dawn ma jirribellawx kontra Alla u ma jitilfux il-fidi minħabba li mhux qed jisimgħu il-verità sħiħa li t-tbatija fid-dinja mhux biss hi kastig ta’ Alla b’kawża tad-dnub oriġinali skond il-Ġenesi imma wkoll skond il-kotba ta’ l-Eżodu u d-Dewteronomju, it-tbatija hi kastig ta’ Alla li jibqa’ jintiret minn ġenerazzjoni għall-oħra sat-tielet u r-raba’ ġenerazzjoni għal dawk kollha li jobogħduh.
Fil-każ aħna lil min se nibdew nemmnu? Il-kelma tal-Mulej skond il-Kotba Mqaddsa, jew lil dawk fostna li mhux qed jitkellmu skond il-Kotba Mqaddsa?