Aħbarijiet | 30 ta’ Marzu 2008 Nr 74

It-teletext tal-PBS bil-ħsara

Julia Farrugia
jfarrugia@mediatoday.com.mt

Kulmin kien jaqliblu fuq it-teletext tal-PBS biex jiċċekkja n-numri tas-Super 5 se jkollu jfittex mezz ieħor kif isir jaf x’inhuma n-numri rebbieħa għax is-servizz li ilu wieqaf għal dan l-aħħar xahar u nofs mhux se jerġa’ jibda minnufih.
Ir-raġuni wara dan hi li l-magna tat-teletext għandha ħsarat kbar u probabbilment diffiċli li tissewwa.
Albert Debono, Kap Eżekuttiv tal-PBS, ikkonferma ma’ Illum li l-kumpanija “hi kommessa li tkompli toffri dan is-servizz.” Debono sostna li bħalissa għaddejjin l-aħħar testijiet fuq din il-magna “madankollu jidher li l-ħsarat huma beyond repair” u kif jidhru l-affarijiet se jkollha tinxtara magna ġdida li tiswa madwar €34,940.60 (Lm15,000).
Il-magna hi proprejtà tal-PBS u tkun amministrata mill-kumpanija sussidjarja ta’ GO, di-ve.
Il-magna ilha tintuża għal dawn l-aħħar 10 snin. Biha kienet titwassal informazzjoni differenti. Fost l-oħrajn it-telespettaturi kellhom aċċess għal tagħrif aġġornat fuq aħbarijiet ewlenin, tbassir tat-temp, spiżeriji li jkunu se jiftħu, numri tal-Lottu u Super 5, skeda tal-programmi fuq stazzjonijiet lokali kif ukoll riżultati sportivi.